சுனாமி 2004(ஆறாம் அத்தியாயம்)

சுனாமி 2004(ஆறாம் அத்தியாயம்)

ஏழெட்டு நிமிடங்களுக்கு பந்து கால் மாறிக்கொண்டிருந்ததே தவிர சொல்லிக்கொள்ளும்படி ஒன்றும் நிகழவில்லை. வீமண்ணாவும் வியூகங்களை மாற்றி மாற்றி ‘எங்களை அங்கே போ இங்கே போ’ என்று விரட்டிக் கொண்டிருந்தாலும் ‘பறக்கும் பருந்துகள்’ பேற்றுக் காவலனின் கைகளுக்குப் பந்து போகவில்லை. எதிர்ப்பக்கமும் அதே நிலைமை தான். இப்படியே சற்று மந்தமாகப்போய்க்கொண்டிருந்த விளையாட்டை மாற்றியது ‘பறக்கும் பருந்துகள்’ கடுகு தான். மைதானத்தின் நடுப்பகுதியிலிருந்து கொஞ்சம் முன்னால் கடுகின் கால்களுக்குப் பந்து கிடைத்ததும் வெட்டி விளையாடாமல் ஒரே அடி. என் வலது காதுக்குப் பக்கத்தில் பந்து கூவிக்கொண்டு போனது. மோகன் அண்ணாவுக்கு பிடிப்பதற்கு வாய்ப்புக் கிடைக்காமல் போக, அவர் தட்டிவிட்ட பந்து துரதிஷ்டவசமாக அடித்த வேகத்துடன் ஓடி வந்து கொண்டிருந்த கடுகின் கால்களிலேயே தஞ்சம் புக, மீண்டும் ஒரு ‘கிண்’ என்ற அடி. பார்வையாளர்களின் ஆரவாரத்தையும் மீறிக்கொண்டு பந்தைப்பிடிக்கப்பாய்ந்து முடியாமற்போய் மோகன் அண்ணா விழுந்த சத்தம் கேட்டது. “ என்னடா கேசவா, பந்தைத் தலையால் முட்டியிருக்கலாம் தானே “ என்று வீமன் அண்ணா என்னைக் கடிந்து கொண்டார்.

எனக்கென்றால் பந்தைத் தலையால் முட்டுவது என்றாலே அலர்ஜி. நெற்றிக்குச் சற்று மேற்பட்ட பகுதி தான் இதற்குப் பாவிக்க வேண்டுமென்றாலும்  அந்தப் பகுதியைப் பாவிக்கும் போது கண்கள் இறுக மூடிக்கொண்டு விடும். அதன் பின் பந்து எங்கே போகிறது என்றும் தெரியாது. உச்சி மண்டையைப் பாவித்தாலோ வேறொரு பிரச்சனை. தலை சற்று நேரத்துக்குக் கிறுகிறுப்பதோடு ஒவ்வொருத்தரும் இரண்டிரண்டு  பேராய்த்தெரிவார்கள். ‘என்னடா, இவ்வளவு பேர் மைதானத்துக்குள் என்ன செய்கிறார்கள்’ என்று யோசிக்க வேண்டியிருக்கும்.

அதன் பின்பு இடைவேளைக்கு முன்னர், வீமன் அண்ணா இலாவகமாக வெட்டிக்கொண்டு வந்து வினோத்தின் கால்களுக்கு அனுப்ப வினோத்தின் மிக வேகமான அடி ‘பறக்கும் பருந்துகள்’ பேற்றுக் காவலனால் மிக அனாயசமாகப்பிடிக்கப்பட்டது. கண்ணனின் மட்டையடிக்கும் சரியான வாய்ப்புக்கள் அமையவில்லை.

இடைவேளையின் போது தண்ணீரைக் குடிக்கும் போது  தலையை  அண்ணாந்து கடைக்கண்ணால் நளினியின் வீட்டைப் பார்த்தேன். கொடிகள் ஒன்றும் தெரியவில்லை. ‘பின்னே, எனது விளையாட்டுக்குப் போய் யாராவது கொடி காட்டுவார்களா’ என்று நினைத்துக்கொண்டேன். அருகில் வந்து தண்ணீர்ப்போத்தலை வாங்கிக் கொண்ட கண்ணன் ‘ கொடி அசைந்ததும் நினைப்பு வந்ததா, நினைப்பு வந்ததும் கொடி அசைந்ததா?’ என்று பாடி விஜயகாந்த் மாதிரி நாக்கைக் கடித்துக்கொண்டு கண்ணடித்தான். கண்ணன் ப்ரியாவின் ஒன்று விட தம்பி. ஏற்கனவே எங்களுக்கிடையிலிருந்த ஈர்ப்பு அவனுக்கு லேசாகத் தெரிந்தே இருந்தது. போதாததற்கு ப்ரியா இன்று எனது விளையாட்டை பார்க்கப்போவதாக வேறு அவனுக்குச் சொல்லியிருக்கிறாள். இனி இவனின் வெறும் வாய்க்கு இந்த விடயம் மெல்லும் அவலாகத்தான் இருக்கப் போகிறது.

இடைவேளை முடிந்து மீண்டும் விளையாட்டுத் தொடங்கியபோது எங்கள் கழக வீரர்களிடம் அதிகமான சுறுசுறுப்பைப் பார்க்க முடிந்தது. அந்த சுறுசுறுப்பு என்னையும் தொற்றிக்கொள்ள  இரண்டு எதிர்த்தரப்பு வீரர்களை இலாகவமாகத் தவிர்த்துக்கொண்டு முன்னேறி கண்ணனுக்கு வாய்ப்பாகப் பந்தைத்தட்ட, கண்ணனின் மட்டையடி தரையிலிருந்து ஒரு அடி உயரத்தில் பேற்றுக்காவலனின்  கால்களுக்கு இடையில் அற்புதமாகப் புகுந்தது. எல்லோரும் சந்தோஷத்துடன் கண்ணனைக் கட்டிக்கொண்டோம். அவன் என் முதுகில் தட்டி ‘”பந்த நல்ல வழமாத் தந்தீங்கள் கேசவனண்ணா..எல்லாரும் கவனிச்சு வையுங்கோ. பந்த மேலால் அடிச்சு கோல் போடுறத விட இது தான் சரி போல இருக்கு” என்றான்.

அதன் பின் இன்னும் சற்று உற்சாகத்துடன் நாங்கள் விளையாடினோம். ஆனாலும் வீமண்ணாவின் நுணுக்கமான அடி, வினோத்தின் முரட்டுத்தனமான அடி எல்லாமே பெற்றுக் காவலனின் கைகளுக்குள் தான் தஞ்சம் புகுந்தது.அதேபோல் எதிர் வீரர்கள் அடித்த பந்தும் மோகன் அண்ணாவின் கைகளிலிருந்து தப்பவில்லை.. விளையாட்டு முடிவதற்கு ஓரிரண்டு நிமிடங்கள் இருக்க, வீமண்ணா தூக்கியடித்த பந்து என்னை நோக்கி வந்தது. “ Head பண்ணுடா கேசவா” என்று வீமண்ணாவின் குரலும் கேட்டது. என் மூலமாக எங்கள் அணி வெல்வதற்குக் கடைசி நேரத்தில் நேரத்தில் கிடைத்த வாய்ப்பு என்று என் மனதுக்குள் பட்சிகள் கூவ, அந்த நேரத்தில் எனக்குக் காட்டப்பட்ட பச்சைக்கொடியும் ஞாபகத்துக்கு வர என் வாழ்வில் முதல்முறையாக கண்ணைத்திறந்து கொண்டு பந்தை அப்படியே நெற்றியால் உள்வாங்கி திசையை மாற்றி பேற்றுக்கம்பத்தின் மூலையினுள் செலுத்தினேன். ‘பறக்கும் பருந்துகள்’ பேற்றுக் காவலன் பெயருக்கேற்றாற்போல் பறந்து பிடிக்க முயற்சி செய்தும் அவனை ஏமாற்றி விட்டு பந்து வலையினுள் நுழைய என்னுடலில் சிலிர்ப்பு, புல்லரிப்பு, ரோமாஞ்சணம், புளங்காகிதம் என இன்னபிற உணர்ச்சிகள் ஒரே நேரத்தில் ஏற்பட்டன.  நான் எங்கள் கழகத்துக்கு  விளையாடத்தொடங்கிய பின் எனக்குக் கிடைத்த முதலாவது பேறு. பந்து வலையினுள் சிக்கிக்கொள்ள, நான் எனது கழக வீரர்களின் அன்புப்பிடியினுள் சிக்கிக் கொண்டேன். எங்கள் பேற்றுக் காவலனான மோகன் அண்ணா கூட ஓடி வந்து முதுகைத் தட்டி தலையைத்தடவி விட்டுப்போனார்.

ஒருவாறு எல்லாம் ஓய்ந்து, பந்தைத் தட்டுவதற்கு, தீப்பிடித்தாற்போல் நின்ற  ‘பறக்கும் பருந்துகள்’ வீரர்களுக்கு வாய்ப்புக்கொடுக்கப்பட்டது. எங்கள் முன்னணி வீரர்களை  இலாவகமாத் தவிர்த்துக்கொண்டு கிடைத்த வாய்ப்பைப் பயன்படுத்திக்கொண்டு ஓங்கி அடித்த பந்து பேற்றுக்கம்பத்திற்கு இரண்டு அடிகள் மேலால் பறக்க, சரியாக அந்தக்கணத்தில் விசிலும் ஊதப்பட்டது.

அதுவரை காத்திருந்த ரவி, நாதன், உதயன், மகேஷ் எல்லோரும் ஓடி   வந்து கட்டிக் கொண்டது மனதுக்கு மிகவும் சந்தோஷமாக இருந்தது. வீமனண்ணா வந்து முதுகைத்தட்டி விட்டு “கேசவன், வாய்ப்புக்கிடைக்கக்குள்ள  பயன்படுத்தினாத்தான் hero. இல்லாவிட்டால் zero. நீ இண்டைக்கு hero” என்று சொல்லி விட்டுப்போனார். மகேஷ் “டேய் கேசவா, நீ உன்ன நோக்கி வந்த பந்த வேணாம் என்று தலையாட்ட அது எதேச்சையாக உன்ட தலையில பட்டு goal post க்குப் போனது எனக்கு மட்டும் தான் தெரியும். ஆனா நான் ஒருத்தருக்கும் சொல்ல மாட்டன்” என்று வெறுப்பூட்ட, நான் செய்ய நினைத்ததை விமலன் செய்தான். “ஆ”   என்று கத்திய மகேஷ் “ டேய் குண்டா,உனக்கு என்னடா?” என்று கேட்க மீண்டும் ஒரு அடி விழுந்தது.

“டேய், உங்கட சண்டய பிறகு வச்சுக் கொள்ளுங்கோடா . கேசவன் அடிச்ச முதல் goal அ கொண்டாட வேணும். இண்டைக்கு இரவு என்ட செலவில எல்லார்க்கும்  கொத்து ரொட்டி’’ என்று ரவி அறிவிக்க  “ இண்டைக்கு  வெள்ளிக்கிழமடா. நாளைக்கு கடல்ல நீந்தி விட்டு ஒரு change க்கு மத்தியானம் கொத்துச்சாப்பிடுவம்” என்ற உதயன்  ஒரு கடல் விலங்கு.ஒரு நாள் முழுவதும் கடலில் நீந்தி விட்டு ‘சரி இப்ப போவமா?’ என்று கேட்டாலும்   இன்னும் கொஞ்ச நேரம் நீந்துவமா’ என்று கேட்கும் ஒரு கடல் பிசாசு. அவனைப்பொறுத்தவரை என்ன கொண்டாட்டம் என்றாலும் அன்று கடலில் நீந்தினால் தான் கொண்டாட்டம் முழுமை பெறும். எங்களில் வினோத்தைத்தவிர மற்ற எல்லோருக்குமே நீச்சலில் ஓரளவு விருப்பம் என்றாலும் அவனளவுக்கு வெறி கிடையாது. 

இதற்கிடையில் கலைந்து சென்று கொண்டிருந்த பார்வையாளர்களும், ஆதரவாளர்களும் எங்கள் வெற்றிக்கு வாழ்த்தியவாறும் வெற்றியைப் பெற்றுக் கொடுத்த கண்ணனையும் என்னையும் பாராட்டியவாறும் சென்று கொண்டிருக்க கடுகு என்று அழைக்கப்படும் விஜயன் தன்னுடைய நண்பனையும் என்னிடம் அழைத்து வந்தான். அவன் தான் ப்ரியாவுடன் சேட்டை விட்டதாக ரவி முன்பே காட்டியிருந்தான். “ super ஆ head பண்ணின  மச்சான். இவனும் உன்னப் பாராட்டோணுமாம் எண்டு வந்தவன்.. இவன் கமல்” என்று கடுகு அறிமுகப்படுத்தினான். இருவரும் கை கொடுத்துக்கொண்டோம். “ நல்லா விளையாடுறீங்கள். உங்கட முதல் goal எண்டு கதச்சவங்கள். அதான் வாழ்த்திட்டுப் போக வந்தனான்” என்றான். அவனது வாழ்த்தில் உண்மையாகப் பாராட்டும் தொனி தெரிந்தது. “யார, இவனையோ நல்லா விளையாடுற எண்டு சொல்ற? வெறும் பெட்ட விளையாட்டு. முட்டாம, மோதாம விளையாடுறதுக்கு இது என்ன கிரிக்கெட்டோ?கை பந்தத்தொடக்கூடாதே தவிர மற்றப்படி ரக்பி மாதிரி விளையாடோணும்” என்று முரட்டுக்குரல் கேட்க திரும்பிப் பார்த்தேன். வினோத்தின் அப்பா.அவர் கிட்டே வர முன்பே சாராய நெடி அடித்தது. கமலின் முதுகில் தட்டி “ Thanks, நீங்களும் நல்லா விளையாடுறீங்கள்’ என்றேன். “ சரி,பிறகு சந்திப்பம்” என்று அவர்கள் புறப்பட “தம்பி, நான் இப்படி வெளிப்படையாச் சொல்லுறன் என்று கோபப்படுறியோ?” என்று என்று என் கையைப் பிடித்துக்கொண்டு வினோத்தின் அப்பா கேட்டார். “ இல்ல ஐயா ,நீங்க சொன்னா அது சரியாத்தானிருக்கும். எனக்குக் கோபம் இல்ல” என்றேன். 20 வருடங்களுக்கு முன்னர் அவர் ஒரு சிறந்த விளையாட்டு வீரர். உயிரைக் கொடுத்து விளையாடுவார். என்றும் அவர் விளையாடியதை விட கால் கை முறித்து கிடந்த நாட்கள் தான் அதிகம் என்றும்  என்று அனேகர் சொல்லி அறிந்திருக்கிறேன். தான் நேசித்த ஒரு விளையாட்டு சம்பந்தமாக கருத்து வெளியிட, அறிவுரை சொல்ல அவருக்கு உரிமை உண்டு என்பது எனது கருத்து.. அவர் என் கையைப் பிடித்துக்கொண்டு மேலும் கதைக்க முயற்சிக்க “அப்பா, வீண் பிரச்சன வேணாம். உடனே வீட்ட போங்கோ” என்று வினோத் வெருட்ட அதோடு உதயனும் ரவியும் “ஓம் அங்கிள். நீங்க வெளிக்கிடுங்கோ” என்று சொல்ல உடனே பெட்டிப்பாம்பாக அடங்கி அந்த இடத்திலிருந்து வெளியேறினார்.   

“ஏண்டா, இப்படிப்பேசிக்கலைக்கிற? அவர் என்னிலல அக்கற இருக்கிறதால தானே அறிவுர சொன்னவர்.” என்றேன்.  இவர்களுக்கெல்லாம் அப்பா இருப்பதால் அப்பாவின் அருமை தெரியாது என்று நினைத்துக்கொண்டேன்.

“ சரிடா, நான் வெளிக்கிடப்போறன். நாளக்கு எத்தன மணிக்கு கடல் குளிப்பம்?” என்று கேட்க உதயன்   “கடல் குளிக்க எண்டு சொல்லக்கூடாது. கடல்ல நீந்த எண்டு சொல்லோணும்” என்று திருத்தினான். “ போடா இவனே. நாங்கள் எல்லாரும் கடல் குளிக்கத் தான் நீ மட்டும் தான் நீந்த” என்று மகேஷ் அவனைத் திருத்தினான். எல்லோரும் ஏக மனதாக 9 மணி என்று முடிவெடுத்ததும்  நான் கிளம்ப ரவியும் என்னுடன் புறப்பட்டான். நளினி வீட்டைத் தாண்ட முன்பு திரும்பிப் பார்க்க,  வாசலில்  நளினி நிற்பது தெரிந்தது. துவிச்சக்கர வண்டியை நிறுத்துவோமா என்று யோசிக்கும் போதே “ கேசவன் கொஞ்சம் நிக்கிறீங்களா?” என்று நளினியின் குரல் கேட்க நான் ரவியைத் திரும்பிப்பார்க்க “ நல்லதே நடக்கும் மச்சான். நாளக்குச் சந்திப்பம்.” என்றவாறு போய் விட்டான். “ஆக்கள் போய்வாற இடம். உள்ள வாரீங்களோ? எங்கட வீட்ட ஆக்கள் இல்ல” என்று நளினி  மீண்டும் அழைக்கவும் என் தயக்கம்  விலகாமல் தயங்கி நின்றேன். இப்ப நீங்கள் உள்ள வரப்போறீங்களோ இல்லையோ? என்று உள்ளேயிருந்து ப்ரியாவின் குரல் கேட்டது.

(தொடரும்)                   

கடலின் கருந்துவாரங்கள்

 

அண்டவெளியில் உள்ள கருந்துவாரங்கள் பற்றி நீங்கள் சில வேளைகளில் கேள்விப்பட்டிருப்பீர்கள். இதன் பெயர் உங்களை வேறு மாதிரி நினைக்கத் தூண்டினாலும் இது கண்ணுக்குப் புலப்படாத ஒரு வெற்று வெளியாகும். மிகவும் சக்தி வாய்ந்த ஒரு பெரிய பொருள் ஒரு சிறிய வடிவமாக ஒடுக்கப்பட்ட பிரதேசமாகும். உதாரணத்துக்கு சூரியனைப் போல பத்து மடங்கு அளவிற் பெரிதான ஒரு நட்சத்திரம் ஏதோ ஒரு காரணத்தினால் அமுக்கத்துக்கு உள்ளாகி அழிவடைந்து அதன் நடுப்பகுதி யாழ்ப்பாண மாவட்டம் அளவு கோளமாக இருக்கும் நிலையைக் கற்பனை செய்து பாருங்கள். சரி அப்படியானால் ஏன் அது கண்ணுக்குப் புலப்படுவதில்லை என்று கேட்பீர்கள். மிகவும் சக்தி வாய்ந்த ஒரு பொருள் ஒரு சிறிய வடிவமாக ஒடுக்கப்படும் போது அதிலிருந்து வெளிப்படும் அளவிட முடியாத புவியீர்ப்பு விசையிலிருந்து ஒன்றுமே .....ஏன் ஒளி கூடத் தப்ப முடியாது என்பது தான் இதன் சிறிய தத்துவம்.இந்த நிகழ்வின் போது பல்வேறு சக்திகள் தோன்றினாலும் அவை எல்லாவற்றையும் விட மேலோங்கும் புவியீர்ப்பானது எல்லாவற்றையும் தனக்குள் அடக்கிக் கொண்டு விடும்.  அதாவது தனது ஒளியைத் தானே விழுங்கிக் கொண்டு அரூபமாக நிற்கும் ஒரு மர்ம சமாச்சாரம் தான் இது. அதாவது சுருக்கமாகச் சொல்லப் போனால் ஒரு நட்சத்திரத்தின் முடிவு ஒரு கருந்துவாரத்தின் ஆரம்பம் எனக் கொள்ளலாம். விளங்குகிற மாதிரியும் இருக்கும். விளங்காத மாதிரியும் இருக்கும். இது வரை  உங்களுக்கு சுருக்கமாகச் சொன்னது அண்டவெளியில் உள்ள கருந்துவாரங்கள் பற்றி. நாங்கள் பார்க்கப் போவது கடலின் கருந்துவாரங்கள் பற்றி. ஏற்கனவே ‘வல்வை அலையோசை’யின் முதலாவது இணைய இதழில் ‘பெர்முடா முக்கோணப் பிரதேசத்தின் தீர்க்கப்படாத மர்மம்’ என்ற பகுதியில் இந்தக் கருந்துவாரங்கள் பற்றி ஒரு இடத்தில் குறிப்பிடப்பட்டிருந்தது.

 

இந்தக் கருந்துவாரங்கள் கடலிலும் குறிப்பாக தெற்கு அட்லாண்டிக் சமுத்திரத்தில் இருப்பதாக தற்போது விஞ்ஞானிகள் கண்டுபிடித்து வயிற்றில் புளியைக் கரைத்திருக்கிறார்கள். தெற்குப் பக்க இவை அதிகம் ஏற்படுவதாலேயே வடக்கு அண்டார்டிக் கடலில் இளஞ்சூடான உப்புத்தன்மையுள்ள நீர் இடம் மாற்றப்பட்டிருக்கிறது என்றும் அவர்கள் தெரிவித்திருக்கிறார்கள். அதற்கு அவர்கள் செல்லமாக ‘எடி’ என்று பெயரும் இட்டிருக்கிறார்கள். ‘எடி’ என்பது நீர்ச்சுழலுக்கு ஒப்பானது. அதன் மையப் பகுதியே கருந்துவாரம் என்று அழைக்கப்படும். இறுக்கமான நீர்ப்பாதைகளால் சூழப்பட்ட இதிலிருந்து ஒன்றுமே தப்பமுடியாது என்பது ஒரு புறமிருக்க இந்த நீர்ச்சுழல் சூழ்ந்த கருந்துவாரங்கள் சில வேளைகளில் மாதக்கணக்கில் நீடிக்கும் என்பதும் அப்போது அந்த நீர்ச்சுழலில் கோடிக்கணக்கான தொன் எடையுள்ள நீர் சுற்றிச் சுழலும் என்பதும் வியக்கத் தக்க, நினைத்துப் பார்த்தால் திகில் தரக் கூடிய விடயங்களாகும்.

இவை சிறிய கடல்களிலோ நீரிணைகளிலோ அல்லது கால்வாய்களிலோ ஏற்படுவதில்லை.பெரிய சமுத்திரங்களிலேயே ஏற்படும். இந்த எடிக்கள் சமுத்திரச் சூழலின் சீதோஷ்ணத்தையே மாற்றக் கூடியன. தென் துருவங்களில் பனிக்கட்டிகள் உருகுவதால் ஏற்படும் தீய விளைவுகளை இவை கணிசமாகக் குறைக்கின்றன என்று விஞ்ஞானிகள் நம்புகிறார்கள். ஆனால் எடிக்களின் எல்லைகள் தெரியாததால் இவை எவ்வளவு தூரம் பாதிப்பைக் குறைக்கின்றன என்றுஅவர்களுக்கு நிச்சயமாகத் தெரியவில்லை.   கணித ரீதியில் இவை அண்டவெளியின் கருந்துவாரங்களுக்கு ஒப்பானவை என்று விஞ்ஞானிகள் தெரிவித்திருக்கிறார்கள். அதாவது அண்டவெளியில் ஒளிக்கு ஏற்படும் கதியே இங்கு இந்த இராட்சத நீர்ச்சூழலில் அகப்படும்  நீருக்கும் ஏற்படும்.

இவை எவ்வாறு உருவாகின்றன என்று விஞ்ஞானிகள் செயற்கைக்கோள் மூலம் கிடைத்த படங்களைக் கொண்டு ஆராய்ந்த போது இந்து சமுத்திரத்தின் தென்கிழக்கில் நகரும் “அகுலாஸ்” எனப்படும் நீரோட்டமானது ஆபிரிக்காவின் கிழக்குப் கரையோரப் பகுதியில் பலமாக நெருக்கப்பட்டு சாதாரண கடர்சுழியாகத் தோற்றம் பெற்று தெற்கு அட்லாண்டிக் நோக்கி நகரும் போது ராட்சச ‘எடி’க்களாக மாறுகின்றன என்று தெரிய வந்திருக்கிறது.    

இது சம்பந்தமாக மேலதிகத் தகவல்கள் திரட்டுவதற்காக விஞ்ஞானிகள் இராட்சத நீர்ச்சுழல் ஒன்றினுள் பெரிய ஒளிக்குமிழ் ஒன்றை விட்டு  செயற்கைக்கோள் மூலம் அவதானித்தனர். இதன் போது சுழலின் உள்ளே  சற்றுத் தூரம்சென்ற அந்த ஒளிக்குமிழ் மீண்டும் வெளியே வந்து ஒரு வட்டமான சுற்றுப் பாதையில் தொடர்ந்து சுற்றக் கண்டனர். ஐன்ஸ்டீனின் ‘போடோன்’ கோளத் தத்துவத்தின்படி ஒரு சக்தி, நீரை மட்டும் உள்ளிழுத்துக் கொண்டு ஏனைய கடினமான பொருட்களை வெளித்தளளுவதாகவும், சில இராட்சத எடிக்களில் ஒரேயளவு நீர், சூழலை விட்டு வெளியே செல்லாமல் ஒரு வருடத்திற்கும் மேலாகச்  சுழன்று கொண்டிருப்பதாகவும் அவதானித்தனர்.

இவ்வாறாக நீரை சுழலுக்கு வெளியே விடாத ‘எடி’க்களே கணித சூத்திரத்தின்படி அண்டவெளியின் கருந்துவாரத்துக்கு ஒப்பிடப்படுகின்றன. உதாரணத்துக்கு ஆறு மாத காலமுடைய எடிக்களில்  ‘போடோன்’ கோளங்களைக் காண முடியும் என்றும் இன்னும் சிறிது காலத்தின் பின் உதாரணமாக ஒன்பது மாத காலமுடைய ‘எடி’க்களில் ‘போடோன்’ கோளங்களைக் காண முடியாது என்றும்  ஏனெனில் அவை நீரை சுழலுக்கு வெளியே விட ஆரம்பித்திருக்கும் என்றும் விஞ்ஞானிகள் தெரிவிக்கின்றனர்.    

 இவற்றுள் ஆராய்ச்சிகளை மேற்கொள்வது சிரமமானதும் ஆபத்தான பணியுமாக இருப்பதால்  மந்த கதியியிலேயே ஆராய்ச்சிகள் மேற்கொள்ளப்பட்டு வருகின்றன. ஆராய்ச்சியின் முடிவில் கடல் காலநிலை, கடற்சூழல் மாசடைதல் பற்றிய அறிய தகவல்கள் கிடைக்கப்பெறும் என்று  விஞ்ஞானிகள் நம்புகிறார்கள்.       

 

சுப்த வஜ்ராசனம்

 

சுப்த என்றால் மல்லாந்து படுத்தல் என்று பொருள்படும். வஜ்ரம் என்றால் வைரம் என்று பொருள்படும். அதாவது இந்த ஆசனத்தில் இருக்கும் போது கிடையாக வைக்கப்பட வைரம் போல் தோன்றுவதால் இந்தப் பெயர் உண்டாகியிருக்கலாம்.

மகாபாரதத்தில் அர்ஜுனன் எய்த அம்புகள் பீஷ்மரின் உடலெங்கும் தைத்து அவர் அம்புப்படுக்கையில் சுப்த வஜ்ராசனத்திலேயே 59 நாட்கள் இருந்ததாகவும்  பாண்டவர்களும் கௌரவர்களும் அந்த அம்புகளை அகற்ற முனைந்த போது பீஷ்மர் அவர்களை,அதனைச் செய்ய விடாமல் தடுத்து இந்த நிலையில் மரணம் எய்துவது ஒரு சுத்த வீரனுக்கு அழகு என்று கூறியதாகவும்  புராணங்கள் கூறுகின்றன. தான் நினைத்த போது தனது உயிரைப் போக்கிக் கொள்ளும் ஆற்றல் பீஷ்மரிடம் இருந்ததால் மகாபாரதப் போருக்குத் தேவையான ஆலோசனைகளை  பாண்டவர்களுக்கும் கௌரவர்களுக்கும் வழங்கிய பின்னரே உயிரைப் போக்கிக் கொண்டார் என்றும் புராணங்கள் மேலும் கூறுகின்றன.

செய்யும் முறை

கடைசியாக வெளி வந்த “வல்வை அலையோசை”யில் வஜ்ராசனம் பற்றிப் பார்த்திருந்தோம்.அதாவது பாதங்களின் மேற்பகுதி தரையில் படுமாறு, முழங்காலிட்டபடி அமர்ந்திருப்பது வஜ்ராசனம். அப்படியே பின்னுக்குச் சரிந்து கைகளைத் தலைக்கு அணையாக வைத்துக் கொண்டோ அல்லது கைகளை முடிந்த அளவு பின்னால் நீட்டிய நிலையில் படுத்திருப்பது சுப்த வஜ்ராசனம் எனப்படும். சாயும் போது வெளி மூச்சும் நிமிரும் போது உள் மூச்சும் வாங்குதல் சிறப்பு. கழுத்துப் பிடிப்புள்ளவர்கள், மூட்டுப் பிடிப்புள்ளவர்கள், இதய நோயுள்ளவர்கள் இதனைத் தவிர்க்க வேண்டும்.

இதன் நன்மைகள்

1.   தொடை, இடுப்புப் பகுதியிலுள்ள தேவையற்ற சதையைக் கொழுப்பைக் குறைக்கும்.

2.   கூன் முதுகு நிமிரும்.

3.   வயிறு,இடுப்பு என்பன நன்கு நீட்டப்பட்டு உரம் பெறும்.

4.   வாயுத்தொல்லை,மலச்சிக்கலுக்கு நல்ல ஆசனம்.

கால்களை மடக்கி அமர்ந்து பின்னால்  முழுமையாகச் சரிய முடியாதவர்கள், கைகளை ஊன்றி அல்லது முழங்கையை ஊன்றி படிப்படியாகச் செய்து பார்க்கலாம்.

 

மிகவும் சிரமப்பட்டு முயற்சி செய்ய வேண்டாம். பின்பு ‘சும்மா கிடந்த சங்கை ஊதிக் கெடுத்தானாம் ஆண்டி’ கதையாகி விடும். “ஏதோ கொஞ்சம் சள்ளையாக இருந்தாலும் கூட ஒரு நோவும் இல்லாமல் இருந்தேன். இந்தப் பாவியினுடைய கதையைக் கேட்டு,சள்ளையைக் குறைப்பதற்காக இந்த யோகாசனத்தைச் செய்யப் போய் இப்படியாகி விட்டேன்” என்றோ அல்லது “எப்படி இருந்த நான் இப்படியாகி விட்டேன்” என்றோ வருந்தும்படி இல்லாமல் முயற்சி செய்வது உங்கள் பொறுப்பு.

பையின் வாழ்க்கை –Life Of Pi

கனடாவில் வாழும் ஒருவர் பாண்டிச்சேரியிலிருந்து இடம்பெயர்ந்து வந்த போது நிகழ்ந்த சம்பவத்தை எழுத்தாளர் ஒருவருக்கு விபரிப்பதாகக் கதை ஆரம்பிக்கிறது.

சிறு வயது முதலே கடவுள் யார் என்ற தேடலை உடைய பை எனப்படும் பிஸ்ஸின் என்ற சிறுவன் தனது அம்மா,அப்பா,அண்ணாவுடன் பாண்டிச்சேரியில் வாழ்ந்து வருகிறான். அவனது அப்பா பாண்டிச்சேரியில் சிறிய அளவிலான ஒரு மிருகக்காட்சி சாலையை நடத்தி வருகிறார்.

ஒவ்வொரு மதத்திலும் ஒவ்வொரு நல்ல விடயத்தைக் காணும் பை எல்லா மதங்களையும் தனது வாழ்வில் பின்பற்றத் தொடங்குகிறான். மாமிச உணவுகளைத் தவிர்த்து சைவ உணவுகளையே உட்கொள்கிறான்.

ஒரு நாள் பையின் குடும்பத்தவர்கள் அனைவரும் மிருகக்காட்சி சாலையிலுள்ள மிருகங்கள் எல்லாவற்றையும்  ஒரு சிறிய கப்பலில் ஏற்றிக் கொண்டு கனடாவுக்குக் குடிபெயர்கிறார்கள். கப்பலில் உள்ள சமையல்காரன் அந்தக் குடும்பத்தின் மீது துவேஷத்தைக் காட்டுகிறான். இன்னொரு சீன நாட்டுக்காரன் அந்தக் குடும்பத்தில் குறிப்பாக பையின் மீது அன்பையும் நட்பையும் காட்டுகிறான்.

இவ்வாறாக இருக்க ஒரு நாள் இடி மழையுடன் மாறத் தொடங்கும் வானிலை சூறாவளி என்ற உச்சக் கட்டத்தை அடைகிறது. பையின் குடும்பத்தவர்கள் அனைவரும் கப்பலின் கீழ்த்தளத்தில் ஆழ்ந்த உறக்கத்திலிருக்க பை மட்டும் சூராவளியைப் பார்த்து ரசிக்க மேல் தளத்துக்கு வார அந்த சமயம் பார்த்து ஒரு ராட்சச அலை அந்தச் சிறிய கப்பலைப் புரட்டிப் போட்டு விடுகின்றது.அந்த அனர்த்தத்துக்குப் பையின் குடும்பத்தவர்கள் அனைவரும் பலியாகி விடுகின்றனர். பை மட்டும் ஒரு சிறிய படகில் தப்பிக்கொண்டு விட அவனோடு சேர்ந்து கொண்டு ஒரு காயமடைந்த வரிக்குதிரையும்,ஒரு குரங்கும் ஒரு ஓநாயும்(ஓநாய்ப்புலி?) கடைசி நேரத்தில் அவனோடு சேர்ந்து தொற்றிக் கொள்கின்றன.

கடலின் ஆக்ரோஷம் தணிந்த பின் ஓநாய் தனது சுயரூபத்தைக் காட்டத் தொடங்குகிறது.முதலில், காயமடைந்த வரிக்குதிரையையும் பின்பு குரங்கையும் கடித்துக் கொல்கிறது. ஓநாய் பை மீது பாய முற்பட தரப்பாளுக்கு அடியில் படுத்துக் கிடக்கும் புலி பாய்ந்து ஓநாயைக் கொல்கிறது. அப்போது தான் புலி அந்தப் படகில் இருப்பதே தெரிய வருகிறது.

இப்போது அந்தப் படகில் பையும் புலியும் மட்டும் தான். இறந்து கிடக்கும் ஒவ்வொரு மிருகமாகச் சாப்பிட்டு முடித்து விட்டு புலி ஒரு கட்டத்தில் பை மீது பாய முற்பட கடலில் குதித்து விடும்  பை, கடலில் மிதக்கும் மரங்களைச் சேர்த்து ஒரு மிதவை தயாரித்துக் கொண்டு அதைப் படகோடு இணைத்துக் கொண்டு அதிலேயே தங்கி விடுகிறான். இடைக்கிடை  புலியின் கவனம் வேறெங்காவது திரும்பியிருக்கும் அல்லது புலி தூங்கும் கணங்களில் அந்தப் படகுக்குப் போய் தனக்குத் தேவையான உணவுப் பதார்த்தங்களை எடுத்துக் கொள்கிறான். மாமிச உணவு இல்லாவிட்டால் தன்னை வேட்டையாடிவிடுமென்ற பயத்தில் புலிக்கு மீன் பிடித்துக் கொடுக்கிறான்.

ஒரு நாள் ஒரு ராட்சசத் திமிங்கிலத்தின் பாய்ச்சலில் படகில் இருந்த  எல்லா உணவுகளுமே கடலில் விழுந்து விடுகின்றன. வேறு வழியில்லாமல் பையும் மீன் பிடித்துச் சாப்பிடத் தொடங்குகிறான். மிதவையில் தொடர்ந்து இருப்பது ஆபத்து என்று நினைத்து கொஞ்சம் கொஞ்சமாகப் புலியைப் பழக்கிக் கட்டுப்படுத்தப் பழகிக் கொண்டதும் படகிலேயே தங்கி விடுகிறான்.  

வினாடிகள் நிமிடங்களாகி, நிமிடங்கள் மணித்தியாலங்களாகி,மணித்தியாலங்கள் நாட்களாகி, நாட்கள் வாரங்களாகி, வாரங்கள் மாதங்களாகின்றன. கண்ணுக்கெட்டிய தூரம் வரையில் பரந்து கிடக்கும் கடலில் ஒரு சிறிய படைகையேனும் காணாமல் சில நாட்களாக மீன்களும் ஒன்றும் பிடிபடாமல் பசி மயக்கத்தின் உச்சத்தில் மரணத்தை வரவேற்கத் தொடங்கும் தருவாயில் ஒரு நாள் ஒரு தீவை அடைகிறார்கள். அங்கே அவர்களுக்குத் தேவையான கிழங்கு வகைகள்,நல்ல தண்ணீர் எல்லாமே கிடைக்கின்றன. ஆனால் இரவு வேளைகளில் நல்ல தண்ணீர் இரசாயன மாற்றங்களுக்கு உட்பட்டு விஷமாகி விடுவதுடன், அங்கே உள்ள தாவரங்களும் மாமிச பட்சணிகள் ஆகி விடுகின்றன என்பது தெரிய வந்ததும் அந்தத் தீவை விட்டு பை ஒடித்தப்பி படகில் ஏறிக்கொள்ள புலியும் கூடவே ஏறிக் கொள்கிறது  

இன்னும் சில மாதங்களுக்குப் பயணம் நீடிக்கிறது. கடைசியாக 227 நாட்களின் பின் ஒரு வழியாக கரீபியன் தீவொன்றில் கரை ஒதுங்குகிறார்கள். கரையில் களைத்து விழும் பை ஏக்கத்தோடு புலியைப் பார்க்க, அது அவனைத் திரும்பிக் கூடப் பார்க்காமல் காட்டுக்குள் நுழைகிறது.   

அங்குள்ள மக்கள் அவனை ஒரு வைத்தியசாலையில் சேர்க்கிறார்கள். வைத்தியசாலையில் என்ன நிகழ்ந்தது என்று அவனை விசாரிக்க அவன் தனது கதையைச் சொல்கிறான். அதனை அவனை நம்ப முடியாது என்று சொல்ல அவன் வேறொரு கதை சொல்கிறான்.

அந்தக் கதையில்  கப்பல் விபத்தின் பின் பையும் அவனது அம்மாவும், துவேஷமுள்ள சமையல்காரனும், நட்பான சீனாக்காரனும் படகில் தப்புகிறார்கள். தப்பும் போது காயமடைந்த சீனாக்காரனைக் கொன்று அவனையே தூண்டிலாகப் பாவித்து மீன் பிடிப்பதோடு சீனாக்காரனைச் சாப்பிடவும் செய்கிறான்.. இதைப் பார்த்து விட்டு  பையின் அம்மா அவனைத் தப்பச் சொல்லி விட்டு அந்த சமையல்காரனோடு சண்டை போட அவன் அவளைக் கொன்று விட ஆத்திரமடைந்த பை பாய்ந்து சமையல்காரனைக் கொன்று விடுகிறான்.

இந்த இரண்டு கதைகளையும் கேட்ட எழுத்தாளர் முதலாவது கதையை ஏற்றுக் கொள்ள திரைப்படம் நிறைவுறுகிறது.

இதில் காயமடைந்த சீனக்காரன் வரிக்குதிரைக்கும்,சமையல்காரன் ஓநாய்க்கும்,பையின் அம்மா குரங்குக்கும் பை புலிக்கும் ஒப்பிடப்படுவதை ஊகிப்பதில் சிரமமில்லை. அப்படியானால் முதலாவது கதையில் வரும் பை யாரென்று மனதில் எழும் கேள்விக்கு நாஸ்திகர்களால் ஏற்றுக் கொள்ள முடியாத விடயம் விடையாகக் கிடைக்கிறது.  

தொண்டைமானாற்றுக் கழிமுகப் பகுதி

நீங்கள் கடற்கரையைப் பார்த்து ரசித்திருப்பீர்கள். ஆற்றங்கரையைப் பார்த்து ரசித்திருப்பீர்கள். இயற்கையழகு கொஞ்சும் இடங்களைப் பார்த்து ரசித்திருப்பீர்கள். இந்த மூன்றையும் ஒன்று சேரப் பார்த்து அனுபவித்திருக்கிறீர்களா? அட்டகாசமாக  இருக்கும். பார்க்கிறீர்களா? பார்க்கிறீர்களா? பார்க்கிறீர்களா?(‘சிங்கம்’ punch dialog இன் பாதிப்பு)

அச்சுவேலியிலிருந்து தொண்டைமானாறு வரும் போது தொண்டைமானாற்றுப் பாலத்தின் இடப்பக்கமாகவும், தொண்டைமானாற்றிலிருந்து அச்சுவேலி போகும் போது தொண்டைமானாற்றுப் பாலத்தின் வலப்பக்கமும் பார்த்திருக்கிறீர்களா?அது தான் தொண்டைமானாற்றுக் கழிமுகப் பகுதி அல்லது ஆற்று முகப் பகுதி. கிட்டத்தட்ட 250 மீற்றர் அல்லது 300 மீற்றர் ஆற்றின் நீரோட்டத்தையும் அதன் பின்பு கடலையும் காணலாம். மாரி காலங்களில் மட்டுமே ஆற்று நீர் கடலுடன் கலக்கிறது.

ஆம். அதாவது வெய்யில் காலங்களில் கடல் கணவனுடன் ஊடல் கொண்டு தள்ளி நிற்கும் ஆற்று மனைவி மழை காலங்களில் ஆவலோடு ஓடி வந்து கடல் கணவனை ஆரத் தழுவிக் கொள்கிறாள். அப்போது சற்று மேட்டுப்பாங்கான ஒரு சின்னப் பகுதி மட்டுமே தீவு போல் இருக்க சுற்றிலும் ஆற்று நீர் கடலை நோக்கிப் பாய்கிறது. மழை மிக அதிகமாகப் பெய்யும் காலத்தில் அந்த மேட்டுப்பகுதியையும் காணக்கிடைக்காது.

ஆனால் கடந்த வருடம் மழை மிகக் குறைவாதலாலும், அத்துடன் தொண்டைமானாற்றின் நிரந்தரமான பாலம் அமைக்கப்படுவதற்கு முன்னர் தற்காலிகமாகப் போடப்பட்டிருந்த இரும்புப்பாலம் பெயர்த்தெடுக்கப்பட்ட போது உடைந்து ஆற்றுக்குள் விழுந்த கட்டிடச் சிதைவுகளாலும் கடந்த மாரியில் கூட ஆற்று மனைவி கடல் கணவனுடன் ஊடலுடன் தான் இருந்திருக்கிறாள். இனி எப்போது கூடல் நிகழப் போகிறதோ தெரியவில்லை.

தொண்டைமானாறு சந்தியிலிருந்து வல்வெட்டித்துறை நோக்கி வரும் பிரதான பாதையில் 200 மீற்றருக்குள் வரும் எல்லா குச்சு ஒழுங்கைகள் மூலமாகவும் இந்த கழிமுகப் பகுதியை அடையலாம். மனதைக் கவரும் மனோரம்யமான இடம். கசூரினா,சாட்டி போன்ற சுற்றுலாப்பயணிகள் அதிகம் போய்வரும் இடங்களை விட அழகாக இருந்தாலும் கூட இது பிற ஊர் ஆட்களால் அதிகமாக அறியப்படாத பகுதியாக இருப்பது ஆச்சரியம் தான்.

பிரதான பாதையிலிருந்து 50 மீற்றருக்குள் இருந்தாலும் நெருக்கமான மக்கள் குடியிருப்புக்கள் இந்த இடத்தை மறைத்து இருப்பது தான் இது மக்கள் மத்தியில் பெரிதும் அறியப்படாத பகுதியாக இருப்பதற்குரிய காரணமாக இருக்கக் கூடும். அதுவும் நல்லதற்குத் தான் .இல்லா விட்டால் இந்தப் பிரதேசமும் கசூரினா,சாடி போன்று பிளாஸ்டிக், பொலித்தீன், கண்ணாடிக் குப்பைகள் நிறைந்து மாசடைந்து போயிருக்கும்.

வழக்கமாக நாங்கள் கடற்கரைக்குப் போனால் ஒரு பக்கம் கடலும் மூன்று பக்கம் நிலப்பகுதியும் இருக்கும். இங்கே எதிர்மாறாக ஒரு பக்கம் நிலப்பகுதியும் இரண்டு பக்கம் கடலும் ஒரு பக்கம் ஆறும் இருப்பது கண் கொள்ளாக் காட்சி. அங்கே நடமாடுபவர்கள், மீனவர்களின் கால்கள் அடிக்கடி படும் இடங்களைத் தவிர ஏனைய கடற்கரை மண்ணுள்ள பகுதிகளில்  ஒற்றுமையின் உயர்வுக்கு உவமானமாகக் கூறப்படும் அடம்பன் கொடிகள் திரண்டு மிடுக்காகக் காணப்படுகின்றன.

ஆங்காங்கே ஒன்றிரண்டு, பெரும்பாலும் அந்தப் பகுதியிலிருந்தே வந்த குடும்பங்கள், ஆற்றங்கரைப் பக்கமாக விளையாடிக்கொண்டிருக்கும் சில சிறுவர், சிறுமிகளைத் தவிர வேறு பொழுது போக்கிற்காக வந்த ஆட்கள் அங்கு பெரும்பாலும் தென்பட மாட்டார்கள். ஆனால்  தொழிலுக்காக அல்லது வயிற்றுப்பாட்டிற்காக இடுப்பளவு கடல் நீரில் நின்று கொண்டு கரைவலை வீசி மீன் பிடிக்கும்  ஏழெட்டு மீனவர்களையும்,மீன் அதிகமாக மாட்டினால் கட்டு மரத்தைக் தள்ளிக் கொண்டு போய் மீன் ஏற்றி வரக் கரையில் தயாராக இருக்கும் ஒன்றிரண்டு மீனவர்களையும் பார்க்கக் கூடியதாக இருக்கும்.

 

மீன்பிடித்தொழிலைத் தவிர ஆற்றுநீர் வெள்ளம் மேவிப் பாய்ந்த போது அங்கு குறிப்பிடத்தக்க அளவு நன்னீர் றால் வளர்ப்புத் தொழிலும் அங்கு மேற்கொள்ளப்பட்டு வந்ததாக அங்கிருந்த மீனவர்கள் மூலம் அறியக்கிடைத்தது.    

இயற்கையாகவே எங்கள் கடற்கரைப்பகுதிகளில்,அலையின் சீற்றத்தைக் குறைப்பதற்காகக் காணப்படும் முருகைக்கற்களை இந்தக் குறிப்பிட்ட பகுதியில் காண முடியாது. அது ஒரு விதத்தில் ஆபத்துத் தான் என்றாலும், சாதாரணமாக நீந்தக் கூடியவர்களுக்கு இந்த அம்சம் அனுகூலம் தான். ஏனெனில் எங்கள் கடற்கரைகளில் நீந்தத் தொடங்குவதற்கு முன் சற்றுத்தூரம் நடந்து கொண்டு போவதற்கிடையிலேயே எங்கள் பாதங்களைப் பாறைகள் பதம் பார்த்து விடும் வாய்ப்புக்கள் அதிகம். இங்கே அந்த ஆபத்து இல்லை. பாறைகள் தான் இல்லையே தவிர, பொதுவாகக் கடற்கரைகளில் காணப்படும் சிப்பி, சோகி, ஊரிக்கற்கள் என்பன  கால்களை உறுத்தும் அளவுக்கு குறிப்பிட்டளவு தூரம் கடலில் பரவிக் காணப்படுகின்றன. ஆற்றின் நீரோட்டம் இதற்குக் காரணமாக இருக்கலாம்.

அக்கரை என்று தொண்டைமானாற்று மக்களால் அழைக்கப்படும் தொண்டைமானாற்றுப் பாலம் தாண்டிய பிரதேசத்தில் முகாம் அமைத்து வசித்து வந்த ராணுவத்தினர் இந்த வருட மாசி மாத ஆரம்பத்தில் அந்த இடத்தை விட்டு நீங்கியது அந்தப் பகுதி மக்களுக்கு அண்மைக் காலத்தில் மிகவும் மகிழ்ச்சியைத் தந்ததொரு விடயமாக அந்தப் பகுதி மக்கள் குறிப்பிடுகிறார்கள். இக்கரைப் பகுதியில் தற்காலிக வீடுகளில் தங்கியிருந்த கிட்டத்தட்ட ஐம்பது குடும்பங்கள் மீண்டும் அக்கரைப் பகுதியில் தங்கள் சொந்தக் காணிகளில் தற்காலிகமாகக் கொட்டகைகள் அமைத்துக் கொண்டு தங்கியிருப்பதாக அவர்கள் தெரிவித்தார்கள். இந்தப் பகுதியில் கரை வலை வீசி மீன் பிடிப்பதும் அவர்கள் தான்.

கடைசியாக இன்னும் ஒரு புராண கால சுவாரசியமான தகவல்.முதலாம் குலோதுங்க  சோழனின் காலத்தில் (கி.பி 1070-1120) அவனது தளபதியாக இருந்த கருணாகரத் தொண்டைமான் இலங்கை மீது படையெடுத்து வந்து இலங்கையை வென்றதாகவும், இவன் யாழ்பாணத்தில் கரணவாய் என்னும் இடத்தில் உப்பு தேவைக்கு அதிகமாக விளைந்து வீணாவதைக் கண்டு இவற்றை சோழ நாட்டுக்கு அனுப்ப முயற்சி எடுத்ததாகவும்  அதன் பிரகாரமே அந்தக் காலத்திற்கும் முற்பட்ட தொன்மை வாய்ந்த வல்லி நதியினை(வல்லி நதி ஓடிய வல்லிப் பெருவெளியே இப்போது வல்லை வெளி என்று அழைக்கப்படுகின்றது) இன்னும் வெட்டி இன்னும் நீளமாக்கி கடலுடன் இணைத்தான் என்று கூறப்படுகிறது. இதன் மூலமாக கடற்காற்று மிகவும் உக்கிரமாக வீசும் காலங்களில் கூட அவனது உப்பேற்றும் மரக்கலங்கள் பாதுகாப்பாக தொண்டைமானாற்றுப் பகுதியில் ஒதுங்கி நிற்க முடிந்தது.( கடலதை நாங்கள் வெல்வோம் என்று ஒரு காலத்தில் எம்மால் அடிக்கடி முணுமுணுக்கப்பட்ட பாடலில் வரும் கடாரம்(மலேசியா) வென்ற சோழன் குலோதுங்க சோழன் அல்ல ராஜேந்திர சோழன் என்பது உங்களுக்கு ஒரு உதிரித் தகவல்.)  

இந்தத் தகவல் ஞாபகம் வந்த போது, இந்த இடங்களிலெல்லாம் கருணாகரத் தொண்டைமான் மற்றும் ஏனைய சோழர்களின் பாதங்கள் பட்டிருக்கும் என்று நினைத்த போது என்னுள் லேசான ஒரு சிலிர்ப்பு. அந்த சிலிர்ப்புடனே அந்த இடத்தை விட்டகன்றேன்.       

சதுரங்கத்தை ஒரு குழுவாக விளையாடுதல் சாத்தியமா?

அண்மையில் எனது மாமா ஒருவருடனும் அத்தான் ஒருவருடனும் கதைத்துக்கொண்டிருந்தேன். இப்போது பெரும்பாலான பாடசாலைகளில் சதுரங்க விளையாட்டுப்பயிற்சிகள், போட்டிகள் என்பனவற்றுக்கு முக்கியத்துவம் கொடுக்கப்படுகின்றன என்ற ரீதியில்  கதை போய்க்கொண்டிருந்த போது தான்  அந்த எண்ணம் எனக்கு உதயமானது. இதை நான் எனது மாமாவிடமும் அத்தானிடமும் சொல்ல அது முடியவே முடியாது என்று அடித்துக் கூறி விட்டார்கள். தலையங்கத்தை வாசித்ததும் அனேகமானவர்கள் நான் அவர்களுக்கு என்ன சொன்னேன்,உங்களுக்கு என்ன சொல்லப்போகிறேன் என்று யூகித்திருப்பீர்கள்.

சரி ,யூகிக்காதவர்களுக்கு......நீங்கள் சதுரங்கம் விளையாடியிருக்கிறீர்களா? இதற்கு உங்களில் அனேகம் பேர் ஆமாம் என்று தான் சொல்வீர்கள் என்று நினைக்கிறேன். ஒன்றிரண்டு விதிவிலக்கானவர்களும் கூட அதன்  விதிமுறைகள்,காய்களை நகர்த்தும் முறைகள் பற்றி அறிந்திருப்பீர்கள்.

சரி எனக்கு ஏற்பட்ட எண்ணத்தை அல்லது சந்தேகத்தைச் சொல்கிறேன். குழுவாக சதுரங்கம் விளையாடுதல் சாத்தியமா? அதாவது சோடி சோடியாக அல்ல. இரு மூளைகள் தானே சதுரங்கத்தில் மோதிக்கொள்ளும். அதற்குப் பதிலாக ஒரு பக்கம் பதினாறு மூளைகளும், அடுத்த பக்கம் பதினாறு மூளைகளும் மோதிக்கொள்ளுதல் சாத்தியமா? அதாவது காய்களுக்குப் பதிலாக மனிதர்கள், கட்டங்களில் இருந்து நகர்ந்து தங்களுக்குள் மோதிக்கொள்ளுதல் சாத்தியமா?

சிறு வயதில் எனது நண்பன் சந்திரகுமாரிடம் வாங்கிப்படித்த சித்திரக்கதைகளுள் ‘சதுரங்க வெறியன்’ என்று ஒரு புத்தகம் படித்ததாக ஞாபகம்.அதில் Spider என்றழைக்கப்படும் சிலந்தி மன்னனும் அவனது எதிரி ஒருவனும் தங்கள் படைவீரர்களை சதுரங்க விளையாட்டில் ஈடுபடுத்தி மோதிக்கொள்வது எனது ஞாபகத்துக்கு வருகிறது.

இதை நடைமுறைப்படுத்தப் புறப்பட்டால் எக்கச்சக்கமான பிரச்சனைகள் வருமென்பது திண்ணம். ஆயினும் ஒவ்வொன்றுக்கும் அதற்குரிய தீர்வும் இருக்குமென்பது எனது எண்ணம்.

உதாரணத்துக்கு யார் நகர்வது என்று தீர்மானிப்பது யார்? ஒவ்வொருத்தரும் தம்பாட்டில் நகரப் புறப்பட்டால் சில சமயங்களில் ஒரே சமயத்தில் பல நகர்வுகள் வருமே?  சதுரங்க விளையாட்டில் மிகவும் திறமையானவர்களைக் கொண்டு விளையாடும் போது அதாவது தங்களின் தவறான ஒரு நகர்வே விளையாட்டின் போக்கை மாற்றிவிடும் என்று அவர்கள் உணர்ந்திருக்கும் பட்சத்தில் இது ஒரு பெரிய பிரச்சனையாக இருக்கப்போவதில்லை என நான் நினைக்கிறேன்.

அப்படியில்லாமல் எல்லோரையும் ராஜாவோ அல்லது ராணியோ கட்டுப்படுத்துவதாக வைத்துக்கொள்ளலாம். அல்லது வெளியிலிருந்து ஒருவர் அனைவரையும் இயக்குவதாகவும் வைத்துக்கொள்ளலாம்.

இதை வாசிப்பவர்கள், இதில் என்னென்ன சாத்தியங்கள் இருக்கின்றன, என்னென்ன அசாத்தியங்கள் இருக்கின்றன அவற்றைத் தீர்த்துக்கொள்ளும் வழிமுறைகள் என்ன என்று உங்கள் மனதில் தோன்றும் பெறுமதியான எண்ணங்களை என்னுடன் பகிர்ந்து கொள்ள முடியுமா?               

வணக்கம்

 

வணக்கம் ,

நீண்ட நாட்களுக்குப் பின் “வல்வை அலையோசை”யின் ஐந்தாவது இதழ் வெளி வருகிறது. இப்படி ஒன்று வெளி வந்தது என்றே மறந்து போகும் அளவுக்கு, நீண்ட நாட்களின் பின். ஆனால் ஆறு மாதங்களுக்கு முன்பு எழுதப்பட்ட ஆக்கங்களும் இதில் அடங்குகின்றன. அது தான் பிரச்சனை. இந்தப் பிரச்சனை சம்பந்தமாக உங்களுடன் எனது எண்ணங்களைப் பகிர விரும்புகிறேன்.

Blog- அனேகர் தங்கள் எண்ணங்கள், கருத்துக்களைப் பரிமாறிக் கொள்ளும், அதே சமயம் தங்கள் எழுத்துத் திறமைகளை வெளிப்படுத்திக் கொள்ளும் தளம். நான் அந்தத் தளத்தைச் சற்று வித்தியாசமாக, கதம்பமாக சில ஆக்கங்களைக் கொடுத்து சஞ்சிகையாக வெளியிட்டேன். ஒவ்வொரு இதழிலும் ‘உலகின் மர்மங்கள்’ என்ற பகுதியைத் தவிர அனைத்துமே சொந்த ஆக்கங்கள். அதைக் கூட ஐந்தாறு இணையத் தளங்களிலிருந்து தகவல்களைத் திரட்டி, அவற்றில்  மிகவும் சுவாரசியமான பகுதிகளைத் தெரிவு செய்து, அவற்றைத் தொகுத்து மொழி பெயர்த்து வழங்கியிருந்தேன். இப்படி எனது ஆக்கங்களைக் கதம்பமாகத் தொகுத்து சஞ்சிகையாக வெளியிட வேண்டும் என்று ஆசைப்படுவதால் (10 ஆக்கங்களுடன்)  ஒவ்வொரு வெளியீட்டுக்கும் பாரிய இடைவெளி ஏற்படுவதைத் தவிர்த்துக் கொள்ள முடியாமலிருக்கிறது.

எனது ஆக்கங்களைத் தனித்தனியாக வெளியிட்டால் வாசிப்பவர்களின் எண்ணிக்கையும் அதிகரிக்கும்.(தொகுத்து வெளியிடுகையில் எல்லோரும் எல்லா ஆக்கங்களையும் படிக்க மாட்டார்கள்) அதோடு இவ்வளவு பெரிய இடைவெளி வராது என்ற எனது மனைவியின், சில நண்பர்களின் வாதம் மிகச் சரியானது தான். ஆனால் சஞ்சிகையாக வெளியிட வேண்டும் என்ற எனது நீண்ட கால விருப்பம் நிறைவேறாமல் போய் விடும். இதற்கு உங்கள் மனதில் ஏதேனும் தீர்வு இருந்தால் தயவு செய்து எனக்குத் தெரிவிப்பீர்களா?

‘வல்வை அலையோசை’ 01.01.2012 வெளியிடப்பட்டதிலிருந்து இன்று வரை, அதாவது ஒரு வருடமும் 5 மாதங்களும் வரையான காலப்பகுதி வரை இதற்குக் கிடைத்த ‘பார்க்கப்பட்ட பக்கங்களின்’ (pageview) எண்ணிக்கை 7010. பெரிய இணையத் தளங்களுடன் ஒப்பிடுகையில் இது ஒன்றுமே இல்லை தான். என்றாலும் மிகக் குறுகிய வாசகர் வட்டத்தைக் கொண்ட ‘வல்வை அலையோசை’ இந்த இலக்கை எட்டியதே என்னைப் பொறுத்த வரை பெரிய விடயம் தான். இலக்கு என்று பெரிதாக ஒன்றுமே நான் நிர்ணயித்துக் கொள்ளவில்லை என்ற போதிலும் வருடத்திற்கு 2000 pageview வந்தாலே போதும் என்று தான் நான் நினைத்திருந்தேன். எப்படியோ, நான் நினைத்ததை விட மிக அதிகமாகப் பங்களித்த வாசகர்கள் அனைவருக்கும் எனது மனமார்ந்த நன்றிகள்.    

நான் பகுதி நேர வேலையாகச் செய்ய உத்தேசித்திருக்கும் ஒரு சேவை பற்றி “உதயமாகிறது ஒரு புதிய சேவை” பகுதியில் தெரிவித்திருக்கிறேன். அதை வாசித்து விட்டு உங்களுக்கோ அல்லது நீங்கள் அறிந்தவர்களுக்கோ அந்த சேவை தேவைப்படும் போது தெரிவிக்குமாறு கேட்டுக் கொள்கிறேன்.

“சுனாமி 2004” தொடர்கதை வாசித்தவர்கள் பெரும்பாலும் கதையை மறந்திருப்பீர்கள். அதற்காக முன் கதைச்சுருக்கம் நான் தரப் போவதில்லை. தயவு செய்து மீண்டும் ஒரு முறை படிக்குமாறு கேட்டுக் கொள்கிறேன். இந்தக் கதையைப் படித்தவர்கள் சிலர் ‘இது உங்கள் கதையா’ என்று கேட்கிறார்கள். நிச்சயமாக இல்லை. ஆனால் ஒன்றிரண்டு சம்பவங்கள் எனக்குச் சில வேளைகளில் பொருந்தக் கூடும். அதே போல் எனது நண்பர்கள், மற்றும் அறிந்தவர்களுக்கும் சில சம்பவங்கள் பொருந்தக் கூடும். அந்த ஒன்றிரண்டு சம்பவங்களைத் தவிர இது முழுக்க முழுக்க எனது கற்பனையில் உதயமானது தான்.

‘ஆனந்தி என்ரபிரைசஸ்’ விளம்பரத்தை தனது வேலைப்பளுவுக்கு மத்தியிலும் மிக அழகாக வடிவமைத்துத் தந்த சதுர்ஷனுக்கு எனது மனமார்ந்த நன்றிகள்.

இனி... வாசியுங்கள்.

உள்ளடக்கம்       

1.இது தான் IELTS.

2.தொண்டைமானாற்றுப் பாலத்தின் பொறியியலாளருடன் ஒரு நேர்காணல்.

3.தொண்டைமானாறு, அச்சுவேலி பாதையின் அவலம்......... தொடர்கிறது.

4. பிரமிக்க வைக்கும் பிரமிட்டுக்கள்.

5. சுனாமி 2004 (ஐந்தாம் அத்தியாயம்)

6. வஜ்ராசனம்

7. உதயமாகிறது ஒரு புதிய சேவை.

8. தெருமூடிமடம்

9. மனிதர்கள் இல்லாத தேசம்.

10. சில விசேட சொற்றொடர்கள்.

இது தான் IELTS.

                                                           இது தான்   IELTS.

IELTS படிக்க நினைக்கும் உங்களில் சிலருக்கு அது பற்றி நிறையச் சந்தேகங்கள் இருக்கக் கூடும். இந்தக் கட்டுரை  மூலம் அனேகமான உங்கள் சந்தேகங்களைத் தீர்த்துக் கொள்ள முடியுமாயின் அது எனக்குச் மகிழ்ச்சியே. ஆங்கிலப் பரீட்சையான IELTS பற்றித் தமிழில் ஒரு கட்டுரை அவசியம் தானா என்றொரு கேள்வி  உங்களில் சிலருக்கு எழக்கூடும். நியாயமான கேள்வி தான். IELTS படிக்கத் தொடங்கிய பின் இதனைப் படிப்பது அவசியம் இல்லையெனினும் படிக்க முன்பு எங்கள் தாய் மொழியிலேயே IELTS பற்றி அறிந்து கொள்வதில் தெளிவு அதிகமென நான் கருதுகிறேன்.    

IELTS என்பதன் விரிவாக்கம் International English Language Testing System.அதாவது சர்வதேச ஆங்கில மொழியைப் பரீட்சிக்கும் பொறிமுறை- ஒருவரின் ஆங்கில மொழியறிவு பற்றி அறிந்து கொள்ள மிகவும் சிறந்ததென உலகளாவிய ரீதியாக ஏற்றுக் கொள்ளப்பட ஒரு பரீட்சை.

ஒரு மொழியின் முக்கியமான நான்கு பிரிவுகளான கேட்டல், வாசித்தல், எழுதுதல், பேசுதல் ஆகியவற்றைப்   பரீட்சிக்கும் இந்தப் பாடநெறியானது 21 வருடங்களுக்கு முன்பு ஸ்தாபிக்கப்பட்ட போதிலும் இன்றும் கூட காலத்தின் போக்குக்கேற்பவும், அதனைக் கற்பவர்களின் தேவைக்கேற்பவும் தன்னைப் புதுப்பித்துக் கொண்டே இருக்கிறது.

ஒருவரின் ஆங்கில மொழியறிவு பற்றி அறிந்து கொள்வதற்கு மிகவும் நம்பகமான பரீட்சை என்று உலகளாவிய ரீதியாக 135 க்கும் மேற்பட்ட நாடுகளில் 7000 க்கும் மேற்பட்ட கல்வி சார்ந்த அமைப்புக்களால் ஏற்றுக்கொள்ளப்பட்டிருக்கிறது. வருடாந்தம் 1.7 மில்லியன் பரீட்சைகள் உலகம் முழுவதும் நடத்தப்படுகின்றன. ஐரோப்பிய நாடுகளுக்குப் புலம் பெயர்ந்தும், மேற்படிப்பைத் தொடர்வதற்காகவும், வேலைவாய்ப்பைத் தேடிக்கொண்டும் செல்பவர்களுக்கும் IELTS பரீட்சைகள் மிகவும் பாதுகாப்பான ,பெறுமதி வாய்ந்த, நம்பகமான தரப்படுத்தல் சான்றிதழை வழங்குகின்றன.

IELTS ஆனது கூட்டாக British Council, IDP-IELTS Australia, Cambridge English Language Assessment ஆகிய நிறுவனங்களால் 130 நாடுகளில் 800 க்கும் மேற்பட்ட பரீட்சை நிறுவனங்கள் மூலமாக நிர்வகிக்கப்படுகின்றது.

British Council  

 

 

British Council ஆனது தனது புது விதமான எண்ணங்கள், செயற்பாடுகள் மூலமாக ஏனைய நாடுகளில் வாழும் மக்களை ஐக்கிய இராச்சியத்துடன் கல்வி கலாச்சார ரீதியாகத் தொடர்பு படுத்துவதுடன் உலகளாவிய ரீதியில் 107 நாடுகளைப் பிரதிநிதித்துவப்படுத்தும் சர்வதேச ஸ்தாபனமாகவும் விளங்குகிறது.

                                                    IDP-IELTS Australia   

 

 

 

 

 

சர்வதேச உயர் படிப்பில் 40 வருடங்களுக்கு மேல் அனுபவம் கொண்ட,IDP யின் துணை நிறுவனமான இது அமெரிக்கா, கனடா, ஐக்கிய இராச்சியம், நியூசிலாந்து, அவுஸ்திரேலியா போன்ற நாடுகளுக்கு மாணவர்கள் கல்வித் தேவைகளுக்காக போக வழிவகை செய்வதுடன், 45 நாடுகளில் 100க்கும் மேற்பட்ட பரீட்சை மையங்களை நிர்வகிக்கிறது.

                             Cambridge English Language Assessment   

 

 

 

 

 

ஆங்கிலத்தைப் பயிலத் தொடங்குபவர்களுக்குச் சரியான அடித்தளமிட்டுப் பயிற்சிகளை வழங்கும் இந்நிறுவனத்தின் பரீட்சைகள் உலகளாவிய ரீதியில் 135 க்கும் மேற்பட்ட நாடுகளில் 8,500 க்கும் மேற்பட்ட கல்வி சார்ந்த நிறுவனங்களால் ஏற்றுக்கொள்ளப்பட்டிருப்பதுடன் வருடாந்தம் 3 மில்லியன் மக்கள் இதன் பரீட்சைகளுக்குத் தோற்றுகின்றனர்.

 

 

 

 

 

 

நாளுக்கு நாள் அதிகரிக்கும் IELTS இன் தேவைகள்

 

 

 

உலகத்திலேயே மிகவும் பிரபலமான ஆங்கில மொழிப்புலமைப் பரீட்சை என்ற பெயரைத் தக்க வைத்துக் கொண்டிருக்கும் IELTS ஆனது தனது பெயரைத் தொடர்ந்து ஸ்திரப்படுத்துவதால் 2011 ஆண்டில் 1.7 மில்லியன் பரீட்சைகளை உலகெங்கிலும் நடாத்தி சாதனை புரிந்திருக்கிறது.

நாளாந்தம் மாறிக்கொண்டேயிருக்கும் பொருளாதார, குடிப்பெயர்வு நிபந்தனைகள் காரணமாக IELTS இற்கான தேவைகளும் அதிகரித்துக் கொண்டே செல்கின்றன. 2010 உடன் ஒப்பிடுகையில் 2011 இல் நடாத்தப்பட்ட பரீட்சைகள் 12 வீத அதிகரிப்பைக் காட்டுகின்றன. 17 வருடங்களாக ஒவ்வொரு வருடமும் அதிகரிப்பையே  காட்டும் IELTS பரீட்சைகள், 2005 இலிருந்து வருடாந்தம் 3 மடங்கான அதிகரிப்பைக் காட்டுவதிலிருந்தே இதற்கான கேள்வி எத்தகையது என்று அறிந்து கொள்ளலாம்.

2011 இல் அமெரிக்காவிலேயே  IELTS இற்கான கேள்வி மிகவும் அதிகரித்துக் காணப்பட்டது. இதற்கு அடுத்தபடியாக கனடாவைக் குறிப்பிடலாம். கிழக்காசிய நாடுகளான இலங்கை, இந்தியா, பாகிஸ்த்தான், பங்களாதேஷ்  நாடுகளிலும் அதே போல் அரபு நாடுகளான ஐக்கிய அரபு இராச்சியம், சவூதி அரேபியா, துருக்கி போன்ற நாடுகளிலும்  இதன் கேள்வியானது குறிப்பிடத்தக்க அளவு அதிகரித்திருக்கிறது.

 

 

 

அவுஸ்திரேலியா, கனடா, ஐக்கிய இராச்சியம், நியூசிலாந்து ஆகிய நாடுகளுக்குக் குடிப்பெயர்பவர்களுக்கு IELTS தகைமையானது ஒரு அத்தியாவசியத் தேவையாகக் காணப்படுகிறது.

British Council இன் தலைமை அதிகாரியான ஜோன் கில்டா என்பவர் “குழுவாக இயங்கும் சர்வதேச வல்லுனர்களால் இதன் பரீட்சைகள் ஆராய்ச்சிக்குட்படுத்தப்படுத்தப்பட்டு ஒருத்தரின் பின்னணி, தேசியம், பால், வாழ்க்கை முறை, வாழும் இடம் போன்ற ஒரு வகையான பாகுபாடும் இல்லாமல் நியாயமாகவும், பட்சபாதம் இல்லாமலும் நடாத்தப்படுகின்றன.” என்று IELTS பரீட்சைகள் பற்றிக் குறிப்பிடுகிறார்.

 

IELTS பற்றிப் பொதுவாகக் கேட்கப்படும் கேள்விகள்  

 

 

1.   IELTS என்றால் என்ன?

ஐரோப்பிய நாடுகளுக்குப் புலம் பெயர்ந்து போகின்றவர்களும், அங்குள்ள கல்லூரிகளில் கற்கை நெறியைத் தொடரப் போகிறவர்களுக்கும் தங்கள் ஆங்கிலத் தகைமையைப் பரீட்சித்துக் கொள்வதற்காக  சர்வதேச ரீதியில் நடத்தப்படுகின்ற ஒரு பரீட்சை. 2011 ஆம் ஆண்டு உலகளாவிய ரீதியாக 1.7 மில்லியன் பரீட்சைகள் நடத்தப்பட்டிருப்பதிலிருந்தே இதன் பிரசித்தத்தை அறிந்து கொள்ளலாம்.

 

 

 

 

 

 

 

 

 

 

 

 

 

 

2.   IELTS பரீட்சைகள் எந்தளவுக்கு உலகளாவிய ரீதியாக ஏற்றுக் கொள்ளப்படுகின்றன?

IELTS சர்வதேச ரீதியாக 7000 க்கும் மேற்பட்ட நிறுவனங்களால் ஏற்றுக் கொள்ளப்பட்டிருக்கிறது. இவற்றுள் பல்கலைக்கழகங்கள், குடிவரவுத் திணைக்களங்கள், அரசாங்க முகவர் நிலையங்கள், உயர் தொழில் ரீதியான நிறுவனங்கள், பல்தேசிய நிறுவனங்கள் என்பன அடங்கும்.

3.   IELTS இன் உரிமையாளர்கள் யார்?

IELTS ஆனது கூட்டாக British Council, IDP-IELTS Australia, Cambridge English Language Assessment ஆகிய நிறுவனங்களால் 130 நாடுகளில் 800 க்கும் மேற்பட்ட பரீட்சை நிறுவனங்கள் மூலமாக நிர்வகிக்கப்படுகின்றது.

 

4.   IELTS பரீட்சைகளைத் தயாரிப்பவர்கள் யார்?

ஆங்கிலம் பேசப்படும் நாடுகளின் நாளாந்த நிலைமைகளைப் பிரதிபலிக்கும் முகமாக அங்குள்ள மொழி வல்லுனர்களால் தயாரிக்கப்பட்டு, அவை நியாயமாகவும், சரியான முறையிலும் தயாரிக்கப்பட்டிருக்கின்றனவா என்று ஏனைய நாடுகளின் வல்லுனர்களால் சரி பார்க்கப்படுகின்றன.

 

5.   IELTS பரீட்சைகள் ஏன் Academic ,General என்ற இரு வகைகளில் நடத்தப்படுகின்றன?(இது மிகவும் கவனிக்கப்பட வேண்டியதாகும். ஏனெனில் இரண்டிலொன்றைத் தெரிவு செய்து கற்றுக் கொண்டிருப்பவர்களுக்குக் கூட இடைநடுவில் சந்தேகம் வருவதுண்டு.)

Academic பரீட்சைகள் வெளிநாடுகளிலுள்ள உயர் கல்லூரிகளில் பாடநெறியைத் தெரிவு செய்து அங்கு கற்கப் போகிறவர்களுக்கு உரியது. General பரீட்சைகள் உயர் பாடசாலைகளில் கல்வியைத் தொடரப் போகிறவர்கள், ஆங்கிலம் பேசும் நாடுகளுக்குக் குடிப்பெயர்ந்து போகிறவர்கள், வெளிநாட்டில் தொழில் புரியப் போகிறவர்கள், தொழில் சம்பந்தமான பயிற்சிக்குப் போகிறவர்கள் போன்றவர்களுக்கு உரியது. Listening (கேட்டல்), Speaking (கதைத்தல்) ஆகிய பரீட்சைகள் இரண்டுக்கும் பொதுவாக இருந்த போதிலும், Reading (வாசித்தல்), Writing (எழுதுதல்) என்பன இரண்டு பரீட்சைகளிலும் வேறுபடுகின்றன.

 

6.   Academic, General இரண்டில் எதை நான் தெரிவு செய்வது?

இதற்கு முதலில் கேட்கப்பட்ட கேள்வியையும், விடையையும் மீண்டும் ஒரு முறை வாசித்து உங்களுக்குத் தெளிவாகப் புரிந்ததா என்று பாருங்கள். சந்தேகம் இன்னும் நீடித்தால் IELTS கற்பதற்குச் செல்லும் இடத்தில் உங்கள் சந்தேகத்தைத் தீர்த்துக் கொள்ளுங்கள்.IELTS கற்பதற்கான விண்ணப்பப் படிவத்தை நிரப்ப முன் உங்கள் சந்தேகம் நிவர்த்தி செய்யப்பட்டிருக்க வேண்டுமென்பதைக் கவனத்திற் கொள்ளுங்கள்.

 

7.   IELTS பரீட்சை என்ன ஒழுங்கில் நடைபெறும்? இதற்கு எவ்வளவு நேரம் எடுக்கும்?

முதலாவதாக Listening. இதற்கு 30 நிமிடங்களும், கேள்வித்தாளில் எழுதிய விடைகளை வினாத்தாளுக்கு மாற்றுவதற்கு 10 நிமிடங்களும் ஆக மொத்தம் 40 நிமிடங்கள். இரண்டாவதாக Reading. இதற்கு 60 நிமிடங்கள். மூன்றாவதாக Writing. இதற்கு 60 நிமிடங்கள். நான்காவதாக அதாவது கடைசியாக Speaking. இதற்கு 11 நிமிடங்களிலிருந்து 14 நிமிடங்கள் வரை. ஆக 3 மணித்தியாலங்களுள் எல்லாப் பரீட்சைகளும் முடிந்து விடும். ஆனால் இதில் முதல் மூன்று பரீட்சைகளும் ஒன்றாகவும், கடைசிப் பரீட்சையான Speaking மற்றப் பரீட்சைகள் நடைபெறுவதற்கு ஒரு வாரத்திற்கு முன்பிலிருந்து ஒரு வாரத்திற்குப் பிறகு வரை ஏதாவதொரு தினத்தில் நடைபெறும்.

 

 

8.   IELTS ஐ எந்தவொரு கல்வி நிறுவனத்திலும் சேர்ந்து படிக்காமல் சுயமாகப் படிக்கிறேன் எனில் எப்படி இதற்கு என்னைத் தயார்ப்படுத்திக் கொள்வது?

நீங்கள் பரீட்சைக்குரிய பணத்தினைச் செலுத்தி விண்ணப்பித்தால் ஒரு வாரத்தில் பரீட்சைக்குரிய பயிற்சிப் புத்தகம் உங்கள் வீடு தேடி வரும். ஆகவே முடிந்தளவு சீக்கிரம் விண்ணப்பித்துக் கொள்வது நல்லது.

 

9.   IELTS பரீட்சைக்குத் தோற்றவிருக்கும் மாற்றுவலுக் கொண்டவர்கள் என்ன செய்ய வேண்டும்?

பரீட்சை நிலையங்கள் மாற்றுவலுக் கொண்டவர்களுக்கான தகுந்த ஏற்பாடுகளைச் செய்யுமாறு பணிக்கப்பட்டுள்ளன. உங்களுக்கு ஏதேனும் விசேட உதவிகள் தேவைப்படுகிறதெனில் உள்ளூர் பரீட்சை நிலையத்துடன் (இலங்கையாயின் கொள்ளுப்பிட்டியிலுள்ள British Council உடன்) தொடர்பு கொண்டு கதைத்துக் கொள்ளுங்கள். இப்படியான தேவை கொண்டவர்கள் 3 மாதங்களுக்கு முன்பே பரீட்சைக்குப் பதிவு செய்து உள்ளூர் பரீட்சை நிலையத்துடன் கதைத்து வைத்திருப்பது நல்லது.

 

 

IELTS பரீட்சைக்குப் பதிவு செய்து கொள்ளுதல்

1.   எங்கு IELTS பரீட்சைக்குத் தோற்றலாம்?

உலகளாவிய ரீதியாக 800 பரீட்சை நிலையங்கள் உள்ளன. இலங்கையில் கொழும்பு,(BMICH-கொழும்பு 07, PIM-கொழும்பு 08) கண்டி,(British Council-Kandy, Australian College Of Business & Technology,)  மாத்தறை(Red Cross Auditorium), மட்டக்களப்பு(Public Library), யாழ்ப்பாணம்(Public Library), ஆகிய மாவட்டங்களில் மட்டுமே பரீட்சைகள் நடத்தப்படுகின்றன.

2.   எப்போது நான் IELTS பரீட்சைக்குத் தோற்றலாம்?

பொதுவாக அந்தந்த இடங்களில் IELTS பரீட்சைக்கு உள்ள கேள்விக்கேற்ப  ஆகக் கூடுதலாக ஒரு மாதத்திற்கு 4 தடவைகள் (பெரும்பாலும் வியாழக்கிழமை, சனிக்கிழமைகளில்)  வீதம் வருடத்திற்கு கிட்டத்தட்ட 48 தடவைகள் பரீட்சைகள் நடத்தப்படுவதால் இதற்கெனக் காத்திருக்க வேண்டிய அவசியமில்லை. இதற்கென உள்ள இணையத்தளத்தில் நீங்கள் பரீட்சைக்குரிய திகதியைத் தெரிவு செய்யலாம்.

 

3.   IELTS பரீட்சைக்கு எவ்வளவு செலவாகும்?

தற்போது மாத்தறை மாவட்டத்தில் மட்டும் 18,500 ரூபாயும் ஏனைய மாவட்டங்களில் 17,900 ரூபாயும் இதற்கென அறவிடப்படுகின்றது.

 

4.   எனது ஏனைய சந்தேகங்களை நேரடியாகத் தீர்த்துக் கொள்வது எப்படி?

விலாசம்:49, Alfred House Gardens

         (P.O.Box No 753)

          Colombo 03

இணைய விலாசம்:http://www.ielts.org/ என்ற விலாசத்தில் பொதுவாக அதாவது உலகலாவிய ரீதியான தகவல்களையும், https://ielts.britishcouncil.org/Default.aspx/  என்ற விலாசத்தில் குறிப்பாக இலங்கை தொடர்பான தகவல்களையும் பெற்றுக் கொள்ளலாம்.

தொலைபேசி மூலமான தொடர்புகளுக்கு: 0114 521521,0117 521521

மின்னஞ்சல் மூலமான தொடர்புகளுக்கு: info.lk.@britishcouncil.org 

 

 

5.   IELTS பரீட்சைக்குப் பதிவு செய்து கொள்வது எப்படி?

Ø  உங்களுக்கு மிகவும் அருகிலுள்ள அல்லது வசதியான பரீட்சை நிலையத்தையும் திகதியையும் தெரிவு செய்து கொள்ளுங்கள்.

Ø   நீங்கள் எடுக்க வேண்டிய பரீட்சை Academicஆ அல்லது General ஆ என்பதைச் சந்தேகத்துக்கு இடமின்றித் தெரிந்து கொள்ளுங்கள்.

Ø  இதற்குரிய விண்ணப்பபடிவத்தை நிரப்பி இணையத்தளம் மூலமாக online இல் அல்லது தபால் மூலமாக offline இல் அனுப்பலாம். இதை நிரப்பும் போது உங்களது சரியான விலாசத்தைக் குறிப்பிடுகிறீர்கள் என்பதனையும் கடவுச்சீட்டில் உள்ளது போல் உங்கள் பெயரைக் குறிப்பிடுகிறீர்கள் என்பதனையும் உறுதிப்படுத்திக் கொள்ளுங்கள்.

Ø  6 மாதத்திற்குள் கடவுச் சீட்டுக்கு எடுத்த புகைப்படத்தின் அளவில், பின்னால் உங்கள் கையெழுத்துக் கொண்ட இரண்டு புகைப்படங்களையும் காலாவதியாகாத கடவுச்சீட்டின் பிரதி ஒன்றையும் தயார்ப்படுத்திக் கொள்ளுங்கள்.(சில பரீட்சை நிலையங்கள் தேசிய அடையாள அட்டையையும் ஏற்றுக் கொள்கின்றன.)

Ø  உங்கள் IELTS பெறுபேறு நீங்கள் கல்வி கற்ற கல்வி நிறுவனத்திற்கு அல்லது பல்கலைக்கழகத்திற்கு அனுப்பப்பட வேண்டுமாயின் விண்ணப்பப்படிவத்தில் அதற்குரிய இடத்தில் சரியான தகவல்களைச் சேர்த்துக் கொள்ளுங்கள்.

Ø  உங்கள் விண்ணப்பபடிவத்தை பரீட்சைக்குரிய பணத்துடன் அருகிலுள்ள IELTS பரீட்சை நிலையத்துக்கு எடுத்துச் செல்லுங்கள். தபால் மூலமாக அனுப்புகிறீர்கள் எனில் நீங்கள் பணம் செலுத்திய முறையைக் குறிப்பிட்டு அதற்குரிய ஆதாரத்தையும் சேர்த்து அனுப்புங்கள்.

Ø  உங்கள் பதிவு பரீட்சை நிலையத்தால் ஏற்றுக் கொள்ளப்பட்டதும் பரீட்சைக்குரிய நேரமும் இடமும் குறிப்பிடப்பட்டு உங்கள் விலாசத்திற்கு  அல்லது மின்னஞ்சலுக்கு அறிவித்தல் வந்து சேரும்.

Ø  பரீட்சை நாளின் போது நீங்கள் விண்ணப்பப் படிவத்தில் குறிப்பிட்ட கடவுச்சீட்டை அல்லது தேசிய அடையாள அட்டையைக்  கொண்டு போகவும்.

 

6.   இதற்கு வழங்க வேண்டிய புகைப்படம் பற்றி இன்னும் சற்றுத் தெளிவாகக் கூறுங்கள்.

§  கடவுச் சீட்டிற்கு எடுக்கும் அளவுடைய இரண்டு படங்கள்.

§  6 மாதத்திற்குள் எடுக்கப்பட்ட படம்

§  படத்தின் பின்னால் கையெழுத்திட்டிருக்க வேண்டும்.

§  நீங்கள் கண்ணாடி அணிபவராயின் அதைக் கழற்றிய பின்னரே படம் எடுக்கப்பட்டிருக்க வேண்டும்.

 

7.   நான் எடுக்கவிருக்கும் பரீட்சையைத் தள்ளிப் போடுவதாயின் அல்லது ரத்துச் செய்வதாயின் என்ன செய்ய வேண்டும்?

நீங்கள் எடுக்கவிருக்கும் பரீட்சையைத் தள்ளிப் போடுவதாயின் அல்லது ரத்துச் செய்வதாயின் பரீட்சைக்கு 5 வாரங்களுக்கு முன் பரீட்சை நிலையத்துக்கு அது பற்றி அறியத் தந்தால் மட்டுமே ஏற்கனவே செலுத்திய பரீட்சைக் கட்டணத்தை மீளப் பெற்றுக் கொள்ளலாம். (அதாவது நிர்வாகச் செலவுக்குரிய ஒரு தொகைப் பணத்தைக் கழித்துக் கொண்டு) 5 வாரங்களுக்கு முன் அறியத் தராத பட்சத்தில் முழுப் பணமும் மீளப் பெற்றுக்கொள்ள முடியாததாகி விடும். நீங்கள் கடும் சுகவீனமுற்று இருப்பின் அல்லது ஏதேனும் தீவிரமான மருத்துவக் காரணங்கள் இருப்பின் இதற்கு விதி விலக்குண்டு. ஆயினும் அதுவும், 5 நாட்களுக்கு முன் உரிய மருத்துவச் சான்றிதழுடன் அறியத் தந்தால் மட்டுமே நிர்வாகச் செலவு தவிர்ந்த மீதிப்பணம் கிடைக்கும். அற்ப சுகவீனங்களுக்கு இவ்விதி பொருந்தாது என்பதை ஞாபகத்தில் கொள்ளுங்கள்.

 

8.   பரீட்சை தினத்தன்று நான் வராமலிருந்தாலோ அல்லது சுகவீனமுற்று இருந்தாலோ பரீட்சைக் கட்டணத்தை மீண்டும் பெற்றுக் கொள்ள முடியுமா?

முன்னறிவித்தல் இல்லையாயின் முழுப்பணமுமே மீளப்பெற முடியாததாகத் தானிருக்கும். கடும் சுகவீனமாயின் தகுந்த மருத்துவச் சான்றிதழுடன் 5 நாட்களுக்குள் அறியத் தந்தால் நிர்வாகச் செலவு நீங்கலாக பரீட்சைக் கட்டணத்தை மீளப் பெறலாம்.  

 

IELTS பரீட்சையின் போது...

 

1.   ஒரே நாளில் IELTS பரீட்சை முடிந்து விடுமா?

Listening, Reading, Writing பரீட்சைகள் ஒன்றன்பின் ஒன்றாக மேற்கூறப்பட்ட ஒழுங்கின்படி இடைவெளியில்லாமல் நடந்து விடும். ஆனால் Speaking ஏனைய பரீட்சைகளுக்கு ஒரு வாரம் முன்னதாகவோ அல்லது பின்னதாகவோ தான் நடக்கும்.

 

2.   எனது கட்டுப்பாட்டிற்கு அப்பாற்பட்ட காரணத்தின் விளைவாக நான் பரீட்சைக்குத்  தாமதித்து  வந்தால் என்ன செய்வது?(உதாரணம்: அரச, தனியார் போக்குவரத்து சேவைகளின் வேலை நிறுத்தம்)

பரீட்சை நிலையம்,  உங்களுக்கு அடுத்துக் கிடைக்கக்கூடிய திகதியில் உங்கள் பரீட்சையை ஒழுங்கு செய்யும்.

 

3.   நான் என்னென்ன பொருட்களைப் பரீட்சை மண்டபத்திற்குக் கொண்டு வரலாம்?

எழுதுகருவிகளான பேனா, பென்சில் மற்றும் அழிப்பான் ஆகியவற்றையே கொண்டு வரலாம். அது தவிர உங்களை அடையாளப்படுத்தக்கூடிய கடவுச்சீட்டையோ அல்லது தேசிய அடையாள அட்டையையோ( விண்ணப்பத்தில் குறிப்பிடப்பட்ட  அடையாள ஆவணம் ) கொண்டு போக மறக்க வேண்டாம்.

அதைத் தவிர ஏனைய அனைத்தையும் பரீட்சை மண்டபத்திற்கு வெளியே, பரீட்சையை நிர்வகிக்கும் அதிகாரிகள் குறிப்பிடும் இடத்தில் வைக்கவும். வைக்கும் போது கைத்தொலைபேசிகளை நிறுத்தி வைக்க மறக்க வேண்டாம். கைத்தொலைபேசிகளை உங்களுடன் வைத்திருந்தாலோ அல்லது வைக்கும் இடத்தில் நிறுத்தி வைக்க மறந்திருந்தாலோ பரீட்சை எழுதுவதற்குத் தகுதி இல்லாதவராகக் கருதப்படுவீர்கள்.

 

4.   கேட்டல்(Listening) மற்றும் கதைத்தல்(Speaking) பரீட்சைகளில் எந்த நாட்டு உச்சரிப்புகள் பெரும்பாலும் பயன்படுத்தப்படும்?

IELTS ஒரு சர்வதேசப் பரீட்சை என்பதால் குறிப்பாக இன்னின்ன நாடுகள் என்றில்லாமல் அனேகமான நாடுகளின் உச்சரிப்புக்கள் பயன்படுத்தப்படும்.

 

5.   கேட்டல் (Listening) பரீட்சையில் அறிவுறுத்தல்களும், கேள்விகளுக்கான இடையிலான இடைவெளியும் வழங்கப்படுமா?

ஆமாம். ஆரம்பத்தில் அறிவுறுத்தலைத் தொடர்ந்து உதாரணக் கேள்வியும் விடையும் தரப்படும். அதன் பின்பு முதலாவது, இரண்டாவது, மூன்றாவது, நான்காவது என்று உரையாடல்கள் இடைவெளியுடன் தொடர்ந்து வரும். ஒவ்வொரு பகுதியும் இரண்டு பிரிவுகளாகப் பிரிக்கப்பட்டு அவற்றுக்கிடையில் இடைவெளியும் இருக்கும். நான்காவது பகுதியில் இந்த இடைவெளி இருக்காது. இறுதியாக கேள்வித்தாளில் நீங்கள் எழுதிய விடைகளை விடைத்தாளுக்கு மாற்றுவதற்குப் 10 நிமிடங்கள் வழங்கப்படும்.

 

6.   வாசித்தல்(Reading) பரீட்சைக்கும் இதே போல் கேள்வித்தாளில் உள்ள விடைகளை விடைத்தாளுக்கு மாற்றுவதற்கு மேலதிகமாக நேரம் வழங்கப்படுமா?

இல்லை.கேட்டல் பரீட்சையிலுள்ள வசதி வாசித்தல் பரீட்சையில் இல்லை. நீங்கள் கேள்வித்தாளில் எழுதிய விடைகளை விடைத்தாளுக்கு மாற்றுவதாயினும்,அல்லது நேரடியாக விடைத்தாளில் எழுதுவதாயினும் உங்களுக்கு வழங்கப்படும் ஒரு மணித்தியாலங்களுள் முடித்துக் கொள்ள வேண்டும்.

 

7.   Listening, Reading பரீட்சைகளுக்கு விடை எழுத நான் பேனாவைப் பாவிக்கலாமா?

இல்லை. பென்சிலைத் தான் பாவிக்க வேண்டும். பென்சிலாயின் நீங்கள் ஏற்கனவே எழுதிய விடைகளை மாற்ற வேண்டுமாயின் அழித்து இலகுவாக மாற்றக் கூடியதாக இருக்கும். அது தவிர இந்த விடைகள் கணனி மூலமாகவே திருத்தப்படுகின்றன. பேனாவால் எழுதிய இந்த விடைகளைக் கணனியால் வாசித்தறிய முடியாது என்று சொல்லப்படுகிறது.

8.   Listening, Reading பரீட்சைகளில், கேள்வித்தாளில் குறிப்புக்கள் எடுத்துக் கொள்ளலாமா?

ஆம் ,நிச்சயமாக. அவை திருத்துபவரால் கவனிக்கப்பட மாட்டாது.

9. Speaking பரீட்சை என்றால் என்ன?

 

ஒரு தகுதி வாய்ந்த, பரீட்சையாளராக இருக்கக் கூடிய சான்றிதழ் பெற்ற ஒருவருடன் நடக்கும் உரையாடலே கதைத்தல் பரீட்சையாகும். இதில் மூன்று பகுதிகள் இருக்கும். உங்களுக்கு வழங்கப்பட புள்ளிகள் நியாயமாக வழங்கப்பட்டனவா என்று ஏனையவர்கள் அறிந்து கொள்வதற்காக உங்களுடன் நடக்கும் உரையாடல்கள் பதிவு செய்யப்படும். அதற்காக நீங்கள் யோசிக்கத் தேவையில்லை.

 

10.   Speaking பரீட்சைக்கு நான் என்ன கொண்டு போக வேண்டும்?

உங்களுடைய அடையாளத்தை நிரூபிப்பதற்காக விண்ணப்பத்தில் நீங்கள் குறிப்பிட்ட அடையாள ஆவணத்தைக்(கடவுச்சீட்டு, தேசிய அடையாள அட்டை) கொண்டு போக வேண்டும்.

 

பரீட்சைப் பெறுபேறுகள்

 

1.   IELTS பரீட்சையில் புள்ளிகள் எவ்வாறு வழங்கப்படும்?

 

இது வரையில் உங்கள்  பரீட்சைகளின் பெறுபேறுகள் 100 இற்கு எத்தனை என்ற அடிப்படையில் தான் வழங்கப்பட்டிருக்கும். ஆனால் இங்கு 9 இற்கு எத்தனை என்ற அடிப்படையில் தான் புள்ளிகள் வழங்கப்படும். உதாரணத்திற்கு 40 கேள்விகளுக்கு 35 விடைகள் சரியாக இருக்குமானால் 35/40 x 9 அதாவது 7.875 இதனைக் கிட்டிய ஒரு தசம தானத்திற்கு மட்டம் தட்டினால் 8 புள்ளிகள் கிடைக்கும். 40 கேள்விகளுக்கு 33 விடைகள் சரியாக இருக்குமானால் 33/40 x 9 அதாவது 7.425 இதனைக் கிட்டிய ஒரு தசம தானத்திற்கு மட்டம் தட்டினால் 7.5 புள்ளிகள் கிடைக்கும். Listening, Reading, Writing, Speaking என்று ஒவ்வொரு பரீட்சைக்குமெனத் தனித்தனியாகவும் பின்பு நான்கு புள்ளிகளையும் கூட்டி நான்கால் வகுப்பதன் மூலம் மொத்தச் சராசரியும் பெறப்படும்.

2.   இந்தப் பரீட்சையில் எத்தனை புள்ளிகள் எடுத்தால் சித்தியெய்தியதாகக் கருதப்படும்?

இந்தப் பரீட்சையில் அப்படி ஒரு அளவுகோல் இல்லை. கல்வி நிறுவனங்கள், பல்கலைக்கழகங்கள், குடிவரவுத் திணைக்களங்கள், அரசாங்க முகவர் நிலையங்கள், உயர் தொழில் ரீதியான நிறுவனங்கள், பல்தேசிய நிறுவனங்கள் என்பன தாம் உள்வாங்க வேண்டிய மாணவர்களின் அல்லது பணியாளர்களின் ஆங்கிலப்புலமை எந்தளவில் இருக்க வேண்டும் என்று தங்களது தனிப்பட்ட தேவையின் அடிப்படையில் அவர்கள் எடுக்க வேண்டிய புள்ளிகளைத் தீர்மானிக்கின்றன.

 

 

3.   எனது பெறுபேறுகள் (பரீட்சை அறிக்கைப் படிவம் Test Report Form) எப்போது கிடைக்கும்?

 

 

பரீட்சை நடைபெற்று 13 நாட்களின் பின் உங்களது பரீட்சை நிலையத்தால் உங்கள் பெறுபேறுகள் தபாலில் அனுப்பப்படும். சில பரீட்சை நிலையங்கள் குறுந்தகவல் மூலமாகவும் பெறுபேறுகளை அனுப்புகின்றன.

4.   எத்தனை பரீட்சை அறிக்கைப் படிவங்கள் எனக்குக் கிடைக்கும் ?

உங்கள் தனிப்பட்ட விலாசத்திற்கு ஒன்று தான் அனுப்பப்படும். அது தவிர ஆகக் கூடுதலாக 5 TRF கள், நீங்கள் விண்ணப்பத்தில் குறிப்பிட்ட நீங்கள் கல்வி கற்ற கல்வி நிறுவனம், பல்கலைக்கழகம், நீங்கள் வேலை செய்யும் நிறுவனம் ஆகியவற்றுக்கு அனுப்பப்படும். சாதாரண உள்நாட்டுத் தபால் சேவையாயின் இலவசமாகவும், வெளிநாட்டு அல்லது கூரியர் சேவையாயின் உங்களிடம் அதற்கேற்ற கட்டணமும் அறவிடப்படும். 5க்கு மேற்பட்ட TRF கள் தேவையாயின் உங்கள் பரீட்சை நிலையத்தைத் தொடர்பு கொள்ளவும். ஆனால் அதற்கு நீங்கள் மேலதிக நிர்வாகக் கட்டணத்தைச் செலுத்த வேண்டியிருக்கும். உங்கள் TRF தொலைந்தாலும் நீங்கள் தெரிவிக்க வேண்டியது உங்கள் பரீட்சை நிலையத்திடம் தான்.

5.   நான் பரீட்சை எழுதிய நிலையம் மூடப்பட்டிருக்குமெனில் எனக்குத் தேவைப்படும் மேலதிக TRF ஐ எவ்வாறு பெற்றுக் கொள்வது?

நீங்கள் பரீட்சை எழுதிய நிலையம் மூடப்பட்டிருந்தாலும் கூட நீங்கள் பரீட்சை எழுதி இரண்டு வருடங்கள் ஆகியிருக்காவிட்டால் http://www.ielts.org/ என்ற இணையத்தளத்தில் Application for additional TRFs (from closed centres) form  என்று அதற்குரிய விண்ணப்பப்படிவத்தைத் தேடி உங்களது சரியான தகவல்களைக் கொடுத்து அதனை அனுப்பினால் (submit செய்தால்) சில நாட்களுக்குள் TRF  நீங்கள்  குறிப்பிட்ட விலாசத்திற்குப் போய்ச் சேரும்.

குறிப்பு:விண்ணப்பபடிவத்தை submit செய்த பின் உங்களது அடையாள ஆவணத்தின் பிரதி ஒன்றையும் scan செய்து அனுப்ப வேண்டும். இவ்வாறான மேலதிக TRF இன் பிரதிகள் உங்களது கல்வி அல்லது தொழில் சார்ந்த நிறுவனங்களுக்கே அனுப்பப்படும். விண்ணப்பதாரிக்கோ, அவரது குடும்பத்தினருக்கோ, அல்லது அவரது நண்பர்களுக்கோ அனுப்பப்பட மாட்டாது என்பதைக் கவனத்திற் கொள்க. இதற்கு மேலதிகக் கட்டணம் அறவிடப்பட மாட்டாது.

6.   நான் ஒரு தடவை பரீட்சை எழுதிய பின் அடுத்த பரீட்சையை எப்போது எழுதலாம்?அதற்கு ஏதேனும் வரையறை உள்ளதா?

அப்படி ஒரு வரையறை இல்லையெனினும் அடுத்த பரீட்சைக்குத் தோற்று முன்பு பரீட்சைக்குத் தேவையான தயார்ப்படுத்தலைச்  செய்யுமாறு IELTS உங்களை அன்போடு கேட்டுக் கொள்கிறது. சில பரீட்சை நிலையங்கள் இதற்கான தயார்ப்படுத்தல்களைச் செய்கின்றன.

7.   எனது பெறுபேறு பிழையென நான் கருதினால் என்ன செய்வது?

நீங்கள் பரீட்சைக்குத் தோற்றிய 6 வாரங்களுக்குள் பரீட்சை எழுதிய நிலையத்தில் மீள்திருத்தத்திற்கு விண்ணப்பிக்கலாம். இதற்கென ஒரு விசாரணைக் கட்டணத்தை நீங்கள் செலுத்த வேண்டியிருக்கும். ஆனால் நீங்கள் ஏற்கனவே பெற்ற பெறுபேறு மாற்றமடையும் பட்சத்தில் இவ்விசாரணைக் கட்டணம் முற்று முழுதாக மீளளிக்கப்படும். ஆனால் IELTS பரீட்சையைத்தாளைத் தயாரிப்பவர்களும் சரி அதனைத் திருத்துபவர்களும் சரி மிகக் கவனமாகக் கடுமையான சட்ட திட்டங்களுக்கு உட்பட்டே செயற்படுகிறார்கள் என்பதை ஞாபகத்திற் கொள்ளவும்.

8.   இலங்கையில் IELTS பரீட்சைக்குப் பதிவு செய்து கொள்ளும் முறை பற்றி சற்று விளக்கமாகக் கூறுவீர்களா?

 

 

 

https:ielts.britishcouncil.org என்ற இணையத் தளத்தில், பரீட்சை எடுக்கப் போகும் நாட்டைத் தெரிவு செய்த பின் அதைத் தொடர்ந்து காலம், இடம், நீங்கள் தோற்றவிருப்பது Academic ஆ அல்லது General ஆ என்பதைத் தொடர்ந்து உங்கள் தனிப்பட்ட விபரங்களைப் பதிவு செய்து கொள்ளுங்கள். அந்தந்தக் காலத்திற்குரிய முடிவு திகதியின் பின் இணையத் தளத்தில் விண்ணப்பப்படிவம் தென்படாது என்பதைக் கவனத்திற் கொள்ளுங்கள். பதிவுகளை நிறைவு செய்து விண்ணப்பித்த பின் அந்தத் தகவல்கள் மாற்றப்பட முடியாதது என்பதையும் ஞாபகத்திற் கொள்ளுங்கள்.

நீங்கள் இணையத் தளம் மூலமாக விண்ணப்பித்து 5 நாட்களுக்குள் பரீட்சைக் கட்டணமான ரூபாய் 18,500 ஐப் பின்வரும் ஏதாவதொரு வழிமுறை மூலமாகச் செலுத்திக் கொள்ளுங்கள்.(இந்தக் கட்டணம் காலத்திற்குக் காலம் அதிகரிக்கும் என்பதை ஞாபகத்தில் கொள்ளவும்.

--காசு,அல்லது காசோலை அல்லது கடனட்டை மூலமாக கொள்ளுப்பிட்டியிலுள்ள British கவுன்சில் இல் நேரடியாக உங்கள் கொடுப்பனவை மேற்கொள்ளுங்கள்.

--வங்கி மூலமாகப் பணத்தை மாற்றீடு செய்து கொள்ளுங்கள்.

--உங்களுக்கு அருகாமையிலுள்ள HSBC கிளை மூலம் நேரடியாகவும்  இலவசமாகவும் British Council  க்குரிய  கொடுப்பனவை மேற்கொள்ளுங்கள்.

நேரடியாகக் கொடுப்பனவை மேற்கொள்ளுமிடத்து உங்களது இரண்டு புகைப்படங்களையும், கடவுச் சீட்டின் பிரதியையும் நேரடியாகவே கையளித்துக் கொள்ளலாம். ஏனைய இரண்டு முறைகளின் போது இவற்றைத் தபால் மூலமாக அனுப்ப வேண்டியிருக்கும் என்பதை மறந்து விடாதீர்கள்.

கடைசியாகச் சொல்லப்பட்ட  இரண்டு வழி முறைகளுக்கும் கீழே உள்ள விபரங்கள் உங்களுக்குத் தேவைப்படும்.

வங்கியின் பெயர்:HSBC

கணக்கின் பெயர்: British Council Srilanka

கணக்கிலக்கம்  :001-002377-௦௦2

விபரம்         :IELTS –உங்களின் முழுப் பெயர்

உங்களின் விண்ணப்பம், கொடுப்பனவு என்பன கிடைக்கப்பட்ட பின்  உங்களுக்கு ஒதுக்கப்பட பரீட்சை நிலையம், இருக்கை எண், நேரம், உங்களுக்கான அறிவுறுத்தல்கள் அடங்கிய மின்னஞ்சல் பரீட்சைக்குக் கிட்டத்தட்ட ஒரு வாரத்திற்கு முன்னதாக வந்து சேரும்.