தொண்டைமானாற்றுப் பாலத்தின் பொறியியலாளருடன் ஒரு நேர்காணல்.

       தொண்டைமானாற்றுப் பாலத்தின் பொறியியலாளருடன் ஒரு நேர்காணல்.

 

 

தொண்டைமானாறு.....கல்கியின் பிரசித்தி பெற்ற “பொன்னியின் செல்வன்” நாவலிலேயே  இடம்பெற்ற(கதையின் முக்கிய பாத்திரங்களுள் ஒன்றான வந்தியத்தேவன் தொண்டைமானாற்றில் வந்து கரையிறங்குவதாக கதையின் ஒரு பகுதியில் வருகிறது) ஒரு வரலாற்றுப் புகழ் பெற்ற நகரத்துக்கும் கிராமத்துக்கும் இடைப்பட்ட ஒரு பிரதேசம். அந்தப் பிரதேசத்திற்குரிய முக்கிய அம்சங்களில் ஒன்று தொண்டைமானாற்றுப் பாலம். இலங்கையின் தலைப்பகுதியான வடமராட்சியை வல்லைவெளிப் பாலம் வலிகாமத்துடன் இணைப்பது போல் தொண்டைமானாற்றுப் பாலமும் வடமராட்சியை வலிகாமத்தின் இடைக்காடு, பத்தைமேனி, வளலாய், தம்பாலை போன்ற கிராமங்களுடன் முக்கிய நகரங்களில் ஒன்றான அச்சுவேலியையும்  இணைக்கிறது.

இந்தப் பாலம் 1987 ஆம் ஆண்டு இடம் பெற்ற ராணுவ நடவடிக்கையான ‘Operation Liberation’ இன் போது விடுதலைப் புலிகளால் பகுதியாளவில் தகர்க்கப்பட்டு பின்னர் திருத்த வேலைகள் மேற்கொள்ளப்பட்டு மீண்டும் 1990 ஆம் ஆண்டில் அடியோடு தகர்க்கப்பட்டதோடு இதனூடான போக்குவரத்து முற்றாகத் தடைப்பட்டிருந்தது. 2007 ஆம் ஆண்டு இராணுவத்தினரின் விநியோக வேலையை இலகுவாக்குவதற்காக இந்தப் பாலம் அவர்களாலேயே கட்டப்பட்டு, அவர்களால் மட்டுமே 2010 இன் நடுப்பகுதி வரை போக்குவரத்தும் மேற்கொள்ளப்பட்டு வந்தது.

மக்களின் வேண்டுகோளை அடுத்து 2010 ஆவணி மாதம் 7ஆம் திகதி இப்பாலம் போது மக்களின் போக்குவரத்துக்கு அனுமதிக்கப்பட்டது. ஏற்கனவே இந்தப் பாலம் பாவனையில் இருக்க 2011 ஆம் ஆண்டு வைகாசி மாதத்தில்  இந்தப் பாலத்திற்குச் சமாந்திரமாக இன்னொரு பாலம் ஐக்கிய நாடுகளின் அலுவலக வேலைத் திட்ட சேவைகள் நிறுவனத்தினரால்(UNOPS) கட்டப்பட்டு வந்தது. இப்போது அதன் கட்டுமாணப் பணிகள் முடிவடையும் தருவாயில் இருக்கிறது. கட்டுமாணப் பணிகள் முழுமையாக நிறைவுற்றதும் இது வீதி அபிவிருத்தி அதிகார சபையிடம்(RDA) ஐக்கிய நாடுகளின் அலுவலக வேலைத் திட்ட சேவைகள் நிறுவனத்தினரால் கையளிக்கப்படவிருக்கிறது.

வேகமாக முழு வீச்சில் நடைபெறும் கடைசி நேரப் பணிகள் கழுத்துக்கு மேல் இருந்தும் என்னைச் சந்திப்பதற்குச் சம்மதம் தந்த இந்தப் பாலத்தின் பொறியியலாளரும், எனது முன்னாள் அலுவலக சகபாடியுமான திரு என்று அழைக்கப்படும் திரு.திருக்குமரனுடன் தொண்டைமானாற்றுப் பாலத்தின் சூழலிலேயே ஒரு பேட்டி.

 

 

 

 

1.   பாலம் கட்டுவதற்காக ஐக்கிய நாடுகளின் அலுவலக வேலைத் திட்ட சேவைகள் நிறுவனத்தினரால் தொண்டைமானாறு ஏன் தெரிவு செய்யப்பட்டது?  ஏற்கனவே  இராணுவத்தினரால் கட்டப்பட்ட பாலம் பாவனையில் இருக்கும் போது இதன் தேவை என்ன? இந்தப் பாலம் கட்டப்பட்ட பின் இராணுவத்தினரால் கட்டப்பட்ட பாலம் பிரிக்கப்பட்டு விடுமா?

சுனாமியினால் முற்றாகப் பாதிக்கப்பட்ட இலங்கையின் வடகிழக்குப் பகுதிகளில் நான்கு பாலங்கள் கட்டுவதற்கு ஸ்பெய்ன் நாட்டு அரசாங்கம் நிதியுதவி வழங்கியது. நான்கு பாலங்கள் கட்டி முடிக்கப்பட்ட பின்னரும் இதற்கென வழங்கப்பட நிதி எஞ்சி விட்டதானால்(நாணய மாற்று விகிதம் காரணமாக) இன்னும் இரண்டு பாலங்கள் கட்டுவதற்குத் தீர்மானிக்கப்பட்டது. அந்தத் தீர்மானம் நிறைவேற்றுவதற்குத் தீர்மானிக்கப்பட்டதும் ஏற்கனவே  வீதி அபிவிருத்தி அதிகார சபையிடம் கட்டுவதற்குப் பிரேரிக்கப்பட்டிருந்த  பாலங்கள் கருத்திலெடுக்கப்பட்டு  அவற்றின் தேவை அடிப்படையிலும், ஏற்படக்கூடிய செலவின் அடிப்படையிலும் தொண்டைமானாற்றுப் பாலமும், திருகோணமலையில் சலப்பையாற்றுப் பாலமும் தெரிவு செய்யப்பட்டன.

      உங்கள் அனுமானம் சரி தான். நிரந்தரமான இந்தப் பாலம் கட்டப்பட்ட பின்னர், இராணுவத்தினரால் கட்டப்பட்ட இந்தப் பாலம் அகற்றப்பட்டு விடும். இலங்கையின் வடகிழக்குப் பகுதிகளில் இராணுவத்தினரால் அமைக்கப்பட்ட இந்த வகையான பெய்லி பாலங்கள் ஏராளமாகப் பாவனையில் உள்ளன. இவை உறுதியான அத்திவாரம் இல்லாமல் தற்காலிகத் தேவையை நிறைவேற்றுவதற்காகக் கட்டப்படும் பாலங்களாகும். இங்கு அகற்றப்படும் பாலங்கள் மக்களின் அல்லது இராணுவத்தினரின் தேவையைப் பொறுத்து வேறு எங்காவது பொருத்தப்படும்.        

2.   இரண்டு பாலங்களும் ஆகக் கூட எவ்வளவு நிறையைத் தாங்கும் வகையில் அமைக்கப்பட்டிருக்கின்றன? இப்பாலங்கள் அடிப்படையில் எவ்வாறு வேறுபடுகின்றன?

பெய்லி பாலங்கள் தற்காலிகத் தேவையை நிறைவேற்றுவதற்காக வேகமாகக் கட்டப்படுவதால் இவை அதிகளவு நிறையைத் தாங்குவதில்லை. இவை கிட்டத்தட்ட 200 மெட்ரிக் தொன் (ஒரு தொன்=1000 kg) நிறையை மட்டுமே தாங்கக் கூடியன.

 

 

 

ஆனால் நிரந்தரமாக அமைக்கப்படும் இந்த கொன்கிரீட் பாலம் கிட்டத்தட்ட 2880 மெட்ரிக் தொன் நிறையைத் தாங்கக் கூடியன. அதாவது உச்ச பட்சமாக நிறை ஏற்றப்பட்ட (அதாவது 50 மெட்ரிக் தொன்) 57 லொறிகளை இந்தப் பாலம் தாங்கும். ஆனால் பாலத்தின் நீளத்தின்படி கிட்டத்தட்ட 32 லொறிகள் தான் இந்தப் பாலத்தில் நிற்கலாம். ஆகவே தனது நீளத்திற்கேற்பத் தாங்கக் கூடிய நிறையை விட அதிகமான் நிறையைத் தாங்குமாறே இந்தப் பாலம் அமைக்கப்பட்டுள்ளது.  

 

 

அடிப்படையில் என்று பார்த்தால் இராணுவத்தால் அமைக்கப்பட்ட பாலம் தற்காலிகமானது. நாங்கள் அமைத்துக் கொண்டிருக்கும் பாலம் நிரந்தரமானது. இராணுவத்தால் அமைக்கப்பட்ட பாலம் 3 மாதங்களுக்குள் கட்டி முடிக்கப்பட்டிருக்கும். நிரந்தரமான இந்தப் பாலத்திற்கு கிட்டத்தட்ட 2 வருடங்கள் எடுத்திருக்கிறது. இராணுவத்தினரின் பாலம்  ஒரு வகை உலோகத்தால் ஒன்றுடன் ஒன்று இணைக்கப்பட்டுக் கட்டப்பட்டது.பொதுவாக எல்லா நாடுகளிலும் இராணுவத்தின் பொறியியல் பிரிவு தான் பெய்லி எனப்படும் பாலங்களைப் பெருமளவில் கட்டுகிறது. இரண்டாம் உலகமகா யுத்தத்தின் போது இங்கிலாந்தில் Donald Bailey என்பவரால் இந்தப் பாலம் வடிவமைக்கப்பட்டதால் அவரின் பெயரே வைக்கபட்டு விட்டது. நாங்கள் கட்டும் பாலம் கொன்கிரீட்  ஆல் அமைக்கப்பட்டுள்ளது. பெய்லி பாலங்கள் மிக வேகமாக உருவாக்கப் படுவதால் சரியாக அத்திவாரம் இடப்படுவதில்லை. ஆனால் நாங்கள் உருவாக்கிய பாலம் ஆற்றில் 16 இடங்களில்  3 அடி விட்டத்தில் தோண்டப்பட்டு வைக்கப்பட்டுள்ள 80 அடி தூண்கள் பாலத்தைத் தாங்கியுள்ளன. நீரினுள் தோண்டுவது எப்படி என்ற சந்தேகம் பொதுவாக  எல்லோருக்கும் வரக் கூடியது தான். இதற்கு ‘Soilmec 40’ எனப்படும் ஒரு வகை நவீன இயந்திரம் பாவிக்கப்படுகிறது. இந்த இயந்திரம் ஆற்றுப்படுகையைத் துளையிடும் போது தண்ணீர் உள்ளே உட்புகாமலிருக்க Bentonite எனப்படும் ஒருவகைத் திரவம் பாவிக்கப்படுகிறது. பெய்லி பாலத்தில் ஏதும் சேதம் ஏற்படுமாயின் பிரதியீடு செய்ய வேண்டிய மூலப்பொருட்கள் இங்கிலாந்திலிருந்து தான் வரவேண்டும்.ஆனால் நாங்கள் கட்டும் பாலத்தில் ஏதேனும் சேதங்கள் ஏற்படுமாயின் அதனை இங்கேயே திருத்திக் கொள்ளலாம். அதுவும், ஒரு வருடத்திற்குள்ளாயின்(defects liability period ) அதனை UNOPS செய்து கொடுக்கும். அதன் பின்னர் ஏற்படும் திருத்த வேலைகளுக்கு RDA பொறுப்பேற்கும்.  

 

 

3.   இந்தப் பாலத்தின் கட்டுமாணப் பணிக்கு UNOPS தவிர வேறு தனியார் ஒப்பந்த நிறுவனம் சேவையாற்றுகிறதா? உங்களைத் தவிர வேறு யாரும் பொறியியலாளராகக் கடமையாற்றுகிறார்களா? உங்களது சக பணியாளர்கள் எத்தனை பேர் என்னென்ன பதவிகளில் கடமையாற்றுகிறார்கள்? திறனுள்ள(skill), திறனற்ற(unskill) தொழிலாளிகள் இது வரை எத்தனை பேர் தங்கள் உடலுழைப்பை இந்தப் பாலத்திற்கு வழங்கியிருப்பார்கள்.?

முதலில் இதன் கட்டுமாணப் பணி தனியார் ஒப்பந்தக்காரரான HAG இடம் கையளிக்கப்பட்டு அதனை ஆளுமைப்படுத்தும் பொறுப்புத் தான் UNOPS இடம் ஒப்படைக்கப்பட்டிருந்தது. ஆனால் அவர்களின் செயல் வேகம் குறைவாக இருப்பதாக அவதானிக்கப்பட்டதால் 2012 கார்த்திகை மாதமளவில் அவர்களின் பணி இடைநிறுத்தப்பட்டு முழுப் பொறுப்பும் UNOPS இடம் கையளிக்கப்பட்டிருந்தது.

 என்னைத் தவிர ஷெய்க் முகமட் ஹுசைன்  என்றொரு பொறியியலாளரும் 2012 இன் இறுதி வரை இங்கு கடமையாற்றினார்.

இங்கு என்னைத் தவிர தொழில் நுட்ப அலுவலர்  ஒருவர், மேற்பார்வையாளர் ஒருவர், நிதி நிர்வாக அலுவலர் ஒருவர், களஞ்சியசாலைப் பொறுப்பாளர் ஒருவர் ஆகியோர் கடமையாற்றுகின்றனர்.

திறனுள்ள, திறனற்ற தொழிலாளிகள் குழுவாகத் தான் வேலை செய்வார்கள்.அதாவது வரும் போது ஒன்றாக வந்த போகும் போது ஒன்றாகப் போய் விடுவார்கள். இது வரையில் 3 அல்லது 4 குழுக்கள் பணி புரிந்திருக்கின்றன. தற்போது திறனுள்ள வேலையாளர்கள் 15 பேரளவிலும் திறனற்ற வேலையாளர்கள் 20 பேரளவிலும் வேலை செய்கிறார்கள்.

4.   இதன் கட்டுமாண வேலைக்கு உங்கள் மேலதிகாரியாக இருப்பவர் யார்?அவர்களின் பெயர், நாடு, வகிக்கும் பதவி போன்ற விபரங்களைக் குறிப்பிட முடியுமா?

எனக்கு மேலதிகாரியாக இருப்பவர் இருப்பிடத் திட்ட முகாமையாளராவார்.(Resident Project Manager) இவரின்‌ பெயர் இப் கிடே ஹன்சன் (Ib Kidde Hansen).இவர் டென்மார்க் நாட்டைச் சேர்ந்தவர்.

5.   இதன் கட்டுமாணப் பணி எப்போது ஆரம்பிக்கப்பட்டது? முடிப்பதற்குத் திட்டமிடப்பட்டது எப்போது?  எப்போது வீதி அபிவிருத்தி அதிகார சபையிடம் கையளிக்கப்படவிருக்கிறது? ஏற்கனவே திட்டமிடப்பட்ட கால வரையறைக்குள் தான் முடிக்கப்படவிருக்கிறதா? அல்லது தாமதமாகியிருக்கிறதா? அப்படியாயின் தாமதத்திற்குக் காரணம் என்ன?

இந்தப் பணி ஆரம்பிக்கப்பட்டது 2011 வைகாசி மாதம் 19ஆம்  திகதி.  முடிப்பதற்குத் திட்டமிட்டது 2012 ஆவணி 19 ஆம் திகதி.(1வருடமும் மூன்று மாதங்களும்)

அபிவிருத்தி அதிகார சபையிடம் கையளிக்கப்படவிருப்பது இன்னும் இரண்டு,  மாதங்களில் அதாவது ஆவணி மாதத்தில்.

இந்தப் பிரதேசத்தில் பாலம் கட்டுவதற்குரிய திறனுள்ள தொழிலாளர்கள் இல்லாமை காரணமாகவும், 2012 இன் இறுதிப் பகுதியில் ஏற்பட்ட சீரற்ற காலநிலை காரணமாகவும் இத்திட்டம் சற்றுத் தாமதமாகியிருக்கிறது.

 பாலத்தின் வேலை இந்த மாதம் இறுதிப் பகுதியில் அதாவது ஆனி மாதம் 31ம் திகதிக்குள் முடிவடைந்தாலும், பாதை பாலத்தோடு இணைக்கப்படும் இரு பகுதியிலும் இன்னும் வேலை முடியவில்லை. ஆவணி மாதமளவில் பாலத்தின் பணிகள் முழு அளவில் நிறைவடைந்து விடும் என்று எதிர் பார்க்கிறோம்.

 

6.   இது முழுக்க முழுக்க ஐக்கிய நாடுகளின் அலுவலக வேலைத் திட்ட சேவைகள் நிறுவனத்தினரால் மட்டுமா அல்லது வேறு ஏதாவது அரசசார்பற்ற நிறுவனங்கள் இதற்கு அனுசரணை வழங்கியிருக்கின்றனவா? இதற்கான நிதிப் பங்களிப்பை வழங்கிய நிறுவனம்/நிறுவனங்கள் அல்லது நாடு/நாடுகள்  என்னென்ன?

இந்தத் திட்டத்திற்கு ஸ்பெய்ன்  அரசாங்கம் நிதிப் பங்களிப்புச் செய்ய, கட்டுமாணப் பணியில் ஈடுபட்டிருப்பது UNOPS மட்டுமே.

7.   இதன் கட்டுமாணப் பணிக்கு என்னென்ன மூலப்பொருட்கள் என்னென்ன அளவுகளில் பயன்படுத்தப்பட்டன?

கம்பி- 300 மெட்ரிக் தொன், சீமெந்து- 550 மெட்ரிக் தொன், பிலைவூட்(8’,4’,1/2’)- 700

8.   இந்தப் பாலத்திற்குத்  திட்டமிடப்பட்ட செலவு எவ்வளவு? உண்மையான செலவு எவ்வளவு?

இதற்குத் திட்டமிடப்பட்ட செலவு 129 மில்லியன் (1m இற்கு 1 மில்லியன் என்ற கணக்கில்). இது வரையில் கிட்டத்தட்ட 90 மில்லியன் முடிந்திருக்கிறது.

9.    இதன் கட்டுமாணத்தில் உள்ள விசேட அம்சங்கள் பற்றிக் குறிப்பிட  முடியுமா?

பாலத்தைத் தாங்கும் தூணின் மேற்பகுதி  ‘Neoprene rubber pads” எனப்படும் மிகவும் விலையுயர்ந்த ,வெளிநாட்டிலிருந்து தருவிக்கப்பட்ட ஒரு வகை ரப்பரினால் செய்யப்பட்டுள்ளது. இதை யாரும் விஷமிகள் சேதமாக்கினால் விபரீதம் நிகழ வாய்ப்பிருக்கிறது. ஏனெனில் இது பாலத்தில் ஏற்படும் அதிர்வுகளைத் தாங்கும் வகையிலும், வெப்பத்தினால் ஏற்படும் விரிவுகளைத் தாங்கும் வகையிலுமே இது பொருத்தப்பட்டுள்ளது.

செல்வச்சந்நிதி ஆலயத்திற்கருகில், ஆற்றின் குறுக்காகப்   பொருத்தப்பட்டுள்ள வான் கதவுகளின் (sluice gate ) நீளத்தை, இந்தப் பாலத்தின் நீளத்திற்கேற்ப அதிகரித்தால், அதாவது தற்போது இதன் நீளம் கிட்டத்தட்ட 100 m .இன்னும் கிட்டத்தட்ட 30 m அதிகரித்து அகழ்வு வேலைகளை மேற்கொண்டால் (அதாவது வான் கதவுகள் அமைக்கப்பட்டும், நீரோட்டம் அற்ற பகுதியை ஆழமாக்கி, நீர் ஒடுமாறு செய்தால்) எதிர் காலத்தில், யாழ் குடா நாட்டில் வெள்ளப்பெருக்கு ஏற்படும் போது இதைத் திறந்து விடும் பட்சத்தில் மிகவும் குறுகிய நேரத்திலேயே வெள்ளம் கடலோடு சேர்ந்து விடும்.

 

 

இந்தப் பாலத்தின் பணிகள் முடிவடைந்து இராணுவத்தின் பெய்லி பாலமும் அகற்றப்பட்ட பின்னர், பாலத்தின் அடிப்பகுதிக்கும், நீர் மட்டத்திற்கும் இடையில் 8 அடிகள் இடைவெளி காணப்படுவதால் சாதாரணமாக ஒரு வள்ளம் போய் வரக் கூடியதாகக் காணப்படுவதால் எதிர்காலத்தில் இது ஒரு சுற்றுலா மையமாகத் திகழக் கூடிய வாய்ப்புக்கள் அதிகமென நான் கருதுகிறேன்.  

 

 

10.   எங்கள் ஊரிலேயே நிறைய வேலையாட்கள் இருந்தும், இதன் கட்டுமாணப் பணிகளின் போது பெரும்பான்மையினருக்கே அதிக வாய்ப்புக்கள் வழங்கியதாக இந்த ஊர் மக்கள் மனக் கிலேசம் கொள்வது பற்றி என்ன சொல்கிறீர்கள்?

இந்தப் பகுதி வேலையாட்களையே அமர்த்தி வேலை செய்த போது அவர்கள் வேலை முடியும் நேரத்திற்கு முன்பே, அல்லது முடிந்த நேரத்துடனே வீட்டுக்குப் புறப்படுவதை அவதானிக்க முடிந்தது. ஆனால் தூரப் பிரதேசத்திலிருந்து வந்து வேலை செய்யும் தொழிலாளர்கள் நேரம் காலம் பார்க்காமல் வேலை செய்வார்கள்.

அதையும் விட முக்கிய காரணம் என்னவென்றால் இங்கேயுள்ள தொழிலாளிகள் சாதாரண கட்டுவேலைத் தொழிலாளிகள் தான். பாலம் கட்டுவதற்குரிய விசேட திறன் அவர்களிடம் இல்லை.        

 

                   பேட்டி:ஆ.தீபன்

            வல்வை அலையோசை(valvaialaiyosai.blogspot.com)

 

 

 

 

 

 

 

 

 

தொண்டைமானாறு, அச்சுவேலி பாதையின் அவலம்........... தொடர்கிறது.

       தொண்டைமானாறு, அச்சுவேலி பாதையின் அவலம்........... தொடர்கிறது.  

முன்பு வெளிவந்த வல்வை அலையோசை நான்காவது இதழிலும் இதே அவலம் தானே என்று போன முறை வாசித்தவர்கள் யோசிப்பீர்கள். ஆம். அவலம் தொடர்கிறது.

2012  ஐப்பசி மாதமளவில் இந்தப் பாதை மோசமாக இருந்தது பற்றி வல்வை அலையோசை படங்களுடன் உங்களுக்கு அறியத் தந்திருந்ததோடு இவற்றின் ஒரு பிரதி வீதி அபிவிருத்தி அதிகார சபைக்கும், பிரதேச செயலருக்கும் மின்னஞ்சல் செய்திருந்தேன். காகம் இருக்கப் பனம் பழம் விழுந்ததோ அல்லது பனம் பழம் விழப்போன நேரம் பார்த்து காகம் போய் இருந்ததோ தெரியவில்லை. எப்படியோ பனம்பழம் விழுந்தது. 2012 ஐப்பசி, புரட்டாசி மாதங்களில் இவ்வீதி திருத்தப்பட்டது. 2012 கார்த்திகை மாதத்தில் எடுக்கப்பட சில படங்கள் உங்கள் பார்வைக்கு.

 

 

ஆனால் இந்த நிலைமை நீடித்தது ஒன்றிரண்டு மாதங்களுக்குத் தான். பின்பு 2012 மார்கழியில் பெய்த மழையில் வீதியை மேவி வெள்ளம் பாய, அந்த வெள்ளத்தால் வீதி கொஞ்சம் கொஞ்சமாக அரிக்கப்பட்டு வீதி கீழே உள்ள படங்களின் நிலைமைக்கு வந்து விட்டது. 2013 பங்குனியில் எடுக்கப்பட்ட சில படங்கள் கீழே தரப்பட்டுள்ளன.........

 

மழைக்காலம் முடிவடைந்து மூன்று மாதங்களின் பின்னரான காலப்பகுதியிலேயே வீதியின் இரு மருங்கிலும் வெள்ளம் இந்தளவுக்கு நிற்கிறதென்றால் மழைக்காலத்தில் எப்படியிருக்குமென்று நினைத்துப் பாருங்கள். ஆனால் இந்தப் பாதை சாதாரணமாகத் திருத்தினால் மட்டும் போதாது என்பதோடு கீழே கற்கள் போடப்பட்டு வீதி ஒன்றிரண்டு அடிகள் உயர்த்தப்பட வேண்டுமென்பது என்னுடைய தாழ்மையான கருத்து.அதாவது மற்ற வீதிகளுக்குச் செய்யப்படும் சாதாரணப் பூச்சு வேலைகள் இதற்குச் சரி வரப் போவதில்லை.

தொண்டைமானாற்றின் ஆற்றுக்குக் குறுக்கே கட்டப்பட்டிருக்கும் வான் கதவுகள் முழுமையாகப்    பயன்படுமாறு ஆற்றுக்கு வடக்குப் பக்கக் கரை இன்னும் ஆழமாகத் தோண்டப்பட்டால் இந்த வெள்ளப் பிரச்சனைக்கு நிரந்தரத் தீர்வு கிடைத்து விடும் என்று  பொறியியலாளர் திருக்குமரன், தொண்டைமானாற்றுப் பாலம் சம்பந்தமான கேள்வி பதில் பகுதியில் குறிப்பிட்டது கவனிக்கப்பட வேண்டிய விடயம்  என்று நான் நினைக்கிறேன்.

கடைசியாக வைகாசி மாத இறுதிப்பகுதியில் பாதையின் நிலைமை.

 

பேரூந்துகள் செல்லும் ஒரு முக்கியமான வீதி மிக மோசமாகச் சேதமடைந்து ஆறு மாதங்களுக்கு மேலாகியும் திருத்தப்படாமல் கவனிப்பாரற்றுக் கிடப்பது ஏன்? அழகான ஒரு வீடு கட்டினால் கண்ணூறு படாமல் பயங்கரமான முகம் வரையப்பட்ட பூசணிக்காய் ஒன்றைக் கட்டித் தொங்க விடுவது எங்கள் பழக்கமல்லவா? அதைப் போல்  கட்டுமாணப் பணிகள் முடியும் தருவாயிலிருக்கும், கம்பீரமான தொண்டைமானாற்றுப் பாலத்திற்குத் திருஷ்டிப் பூசணிக்காயாக இந்தப் பாதை இருக்கட்டும் என்று நினைத்து விட்டு வைத்திருக்கிறார்களோ?    

 

 

பிரமிக்க வைக்கும் பிரமிட்டுக்கள்.

                                           பிரமிக்க வைக்கும் பிரமிட்டுக்கள்.

 

 



பிரமிட்டுக்கள்..... இவை எப்போதுமே சக்தி வாய்ந்த,எங்கள் கற்பனைக்கு அப்பாற்பட்ட  மர்மங்களைத் தன்னகத்தே கொண்டனவாகவும்  உலகின்  மிகவும் புராதனமான இராட்சத  ஞாபகச்சின்னங்களாகவும் கருதப்படுகின்றன. ஏறத்தாழ 5,000 வருடங்கள் கடந்தும் எத்தனையோ இயற்கைச் சீற்றங்களுக்கு உட்பட்டும் கம்பீரமாக நிமிர்ந்து நிற்கும் பிரமிட்டுக்கள்  பிரமிப்பின் உச்சம் தான். யார் இதைக் கட்டினார்கள், ஏன் இதைக் கட்டினார்கள், எவ்வாறு இதைக் கட்டினார்கள், இந்தச் சின்னம் எதனை வெளிப்படுத்துகிறது போன்ற கேள்விகளுக்கெல்லாம் மனிதன் விடை தேடிப் புறப்பட நிறையத் தத்துவங்கள் கிடைத்திருக்கின்றன. அவை ஒரு புறமிருக்க புதைபொருள் ஆராய்ச்சியாளர்கள்  என்றாலும் சரி, அசாதாரண நடவடிக்கைகள் சம்பந்தமாக ஆராய்ச்சிகளை மேற்கொள்பவர்களாக இருந்தாலும் சரி. அவர்கள் பிரமிட்டுக்களை நோக்கிக் கவர்ந்திழுக்கப்படுவதன் காரணம் தான் என்ன?

எகிப்தின் பிரமிட்டுக்கள் வெளிப்படுத்திய விடயங்களுள் கிட்டத்தட்ட பத்து வீதமானவையே நிரூபிக்கப்பட்டிருக்கின்றன. மீதமுள்ள தொண்ணூறு வீதமானவை ஊகங்களின் அடிப்படையில் தான் உலாவுகின்றன. பிரமிட்டுக்களின் முக்கிய மர்மங்களாகக் கருதப்படுவன அவை என்னென்ன உபகரணங்களைக் கொண்டு கட்டப்பட்டிருக்கலாம் என்பதும், அவற்றின் நிறமும், அவற்றினுள்ளே வைக்கப்பட்டிருக்கும் பாடம் செய்யப்பட்ட உடல்களும் தான். 21ம் நூற்றாண்டில் அசுர வளர்ச்சியடைந்திருக்கும் தொழில்நுட்பங்களின் உதவியாலும் கூட அவற்றின் மர்மங்களின் முடிச்சவிழ்க்க முடியவில்லை என்பது ஆச்சரியம் தான். அங்கே ஆராய்ச்சிகளை மேற்கொண்ட அனேகமான ஆராய்ச்சியாளர்கள் பிரமிட்டுக்கள் வெறுமனே அரசர்களின் கல்லறையாக மட்டுமே இருக்கின்றன என்ற கருத்தை ஏற்றுக் கொள்ளவில்லை. ஏனெனில் ஆராய்ச்சியாளர்கள் அங்கு ஆராய்ச்சிகளை மேற்கொண்ட போது அங்கிருந்த நூற்றுக்கும் மேற்பட்ட பிரமிட்டுக்களில் பாடம் செய்யப்பட்ட சடலங்கள் காணப்படவில்லை. ஆனால் அவை கல்லறைத் திருடர்களின் கைவரிசையாக இருக்கலாம் என்ற கருத்தையும் அவர்கள் ஏற்றுக் கொள்ள மறுக்கவில்லை.

 பிரமிட் என்றாலே எகிப்து தான் அனேகமானவர்களுக்கு ஞாபகம் வரும். ஆனாலும் எகிப்தைத் தவிர மெசொபத்தேமியா, நைஜீரியா ,சூடான், கிறீஸ், இந்தோனேஷியா, ஸ்பெயின், சீனா ஆகிய நாடுகளிலும் பிரமிட்டுக்கள் உண்டு என்ற விடயம் பெரும்பாலானவர்களுக்குத் தெரிவதில்லை.

பிரமிட்டுக்களை பொறியியல் தொழில்நுட்பம், கட்டிடக்கலை, கணிதம் ஆகியவற்றில் மிகவும் மேன்மையான நிலையில் இருந்தவர்களே கட்டியிருப்பார்கள் என்று கருத இடமுண்டு. ஏனென்றால்  பிரமிட்டுக்களைத் தாங்கியிருக்கும் தளங்களின் நீள அகலங்கள் அங்குலத்திற்கும் குறைவான வித்தியாசத்தையே காட்டுகின்றன. 

நிறைய புத்திஜீவிகள் பிரமிட்டுக்களுடன் எண்சாஸ்திரத்துக்கும், வானசாஸ்திரத்திற்கும் தொடர்பிருப்பதாக நம்புகிறார்கள். வியக்கத்தக்க வகையில் பிரமிட்டுக்களின் தளத்தின் சுற்றளவு, பூமி சூரியனைச் சுற்றி வர  எடுக்கும் நேரத்துக்குச் சமனாக இருப்பதாகத் தெரிவிக்கிறார்கள். புராதன எகிப்தில் வாழ்ந்த மக்கள் ஏழாம் எண்ணைப் புனித எண்ணாகக் கருதினார்கள். பிரமிட்டுக்களின் அடிப்பக்கம் நான்கு பக்கங்களைக் கொண்டிருப்பதாகவும் அதன் முகப்பக்கம் மூன்று பக்கங்களைக் கொண்டிருப்பதாகவும்  ஆக மொத்தம் ஏழு பக்கங்களைக்  கொண்டிருப்பதாகவும் எண் ஏழு போலவே பிரமிட்டுக்களையும் மிகவும் புனிதமாகக் கருதினார்கள் என்பதில் சந்தேகமில்லை என்றும் ஆராய்ச்சியாளர்கள் நம்புகின்றனர்.

பிரான்ஸ் நாட்டின் மாவீரனான நெப்போலியன் ஒரு நாள் இரவு தனியே ஒரு பிரமிட்டில் தங்கியதாகவும் அடுத்த நாள் காலை வெளியே வந்து “உள்ளே என்ன நிகழ்ந்தது என்று சொன்னால் நீங்கள் நம்ப மாட்டீர்கள்” என்று மட்டுமே தெரிவித்ததாகவும் நெப்போலியனைப் பற்றி உள்ள குறிப்புக்களில் ஒன்று தெரிவிக்கிறது.

பிரமிட்டுக்கள் பிரபஞ்சக் கட்டமைப்பையும்,பிரபஞ்சக் கோட்பாட்டையும்  விளக்குவனவாகவும் மனிதனாகப் பிறந்து ஆற்ற வேண்டிய கடமையை ஞாபகப்படுத்துவனவாகவும் இருக்கின்றன  என்பது சிலரின் கருத்து. என்னதான் இரத்தமும் சதையுமாகப் பிறந்திருந்தாலும் கூட, இரத்தமும் சதையுமுள்ள உடலை விட்டு நீங்கி முடிவில்லாத சாசுவதமான நிலையை  அடைவதே மனிதனின் இறுதிக் குறிக்கோளாக இருக்க வேண்டும் என்று பிரமிட்டுக்களில் உள்ள எகிப்திய எழுத்துக்களும் சித்திரங்களும் எடுத்துக் காட்டுகின்றன.  

 

இன்னுமொரு சுவாரசியமான விடயம் என்னவெனில் நேரத்தைக் கணிப்பதற்கு கணிதத்தைப் பாவித்தவர்களும், அத்துடன்  வானசாஸ்திரத்தைக் கொண்டு பிரமிட்டுக்களின் அமைவிடத்தைக் கணித்தவர்களும் எகிப்தியர்கள் தான் என்பது தான்.’கிஷா’ பிரமிட் உள்ளடங்கலாக எல்லாமாக ஒன்பது பிரமிட்டுக்களில் வானசாஸ்திரம் பற்றி நிறைய உபயோகமான தகவல்கள் உள்ளன அங்கு ஆராய்ச்சிகளை மேற்கொண்ட ஆராய்ச்சியாளர்கள் குறிப்பிடுகின்றனர்.

பிரமிட்டுக்கள் எந்தக் கற்களின் மூலம் கட்டப்பட்டனவோ அவற்றிலும் மர்மம் தான். பிரமிட்டுக்களில் கட்டட வேலையை மேற்கொண்டவர்கள் உட்பக்கமாகவா அல்லது வெளிப்பக்கமாகவா வேலையை மேற்கொண்டனர், கற்கள் மேலிருந்து கீழாகவா அல்லது கீழிருந்து மேலாகவா  வைத்துக் கட்டப்பட்டன, கற்கள் வைத்துக் கட்டப்படுவதற்கு முன்பு மெருகேற்றப்பட்டனவா அல்லது வைத்துக் கட்டப்பட்ட பின் மெருகேற்றப்பட்டனவா,இயந்திரங்கள் ஒன்றும் இல்லாத அந்தக் காலத்தில் எவ்வாறு இவ்வளவு அழகாக கற்கள் செதுக்கியது போல் உடைக்கப்பட்டன, எங்கே வைத்து உடைக்கப்பட்டன, எவ்வாறு கொண்டு வரப்பட்டன என்ற மர்மங்களுக்கெல்லாம் இன்னும் விடை கிடைத்தபாடில்லை. எவ்வாறாயினும் பிரமிட்டுக்கள் எவ்வளவுக்கெவ்வளவு  பெரிதாக உள்ளனவோ அவ்வளவுகவ்வளவு கீர்த்தி வாய்ந்த அரசர்களுக்காகவே அவை கட்டப்பட்டிருக்கின்றன  என்று ஆராய்ச்சியாளர்கள் நிச்சயமாக நம்பினார்கள்.               

புராதன எகிப்தியர்கள்,  உடலை விட்டு உயிர் பிரிந்த பின் உயிரானது வேறோர் பரிமாணத்தில் தனது வாழ்க்கையைத் தொடர்கின்றது என்று நம்பினார்கள். இதனாலேயே உயிர் நீத்த தங்கள் அரசர்களின்  பாடம் செய்த உடல்களின் கல்லறையாகக் கட்டப்பட்ட  பிரமிட்டுக்களில் வாழ்க்கைக்குத் தேவையான பொருட்களையும் எல்லாவிதமான செல்வங்களையும், பொக்கிஷங்களையும் இட்டு நிரப்பியிருந்தார்கள் என்று நிலவிய நம்பிக்கை இன்றும் தொடர்கிறது. இதனாலேயே கல்லறைத் திருடர்கள் தங்கள் உயிரையும் பணயம் வைத்து  அந்தச் செல்வங்களைத் தமதுடமையாக்கிக் கொள்ளத் துடித்தார்கள்.

 

 

 

பெரும்பாலான பிரமிட்டுக்கள் கி.மு 2800 க்கும் கி.மு 2200 க்கும் இடைப்பட்ட காலப்பகுதியிலேயே கட்டப்பட்டிருக்கின்றன என்று கட்டிடக் கலைஞர்கள் நம்புகிறார்கள். பிரமிட்டுக்களில் முதலாவது பிரமிட் என்று நம்பப்படுவது மெம்பிஸ் என அழைக்கப்படும் இடத்திற்கு அருகிலுள்ள சக்குவாரா எனும் இடத்தில் சோசர் என அழைக்கப்படும் மன்னனுக்காக அவனது பூதவுடலையும் அவனுக்காக வைக்கப்பட்ட பொருட்களையும் வைத்துக்  கட்டப்பட்ட பிரமிட்டாகும்.இது முதலாவது பிரமிட் ஆகையால் சரியான பிரமிட்டின் வடிவத்தைப் பெற்றிருக்கவில்லை என்று தான் சொல்ல வேண்டும். அதற்குப் பின் வந்த நூற்றாண்டுகளில் செனவிரு என்ற அரசனால் மூன்று பிரமிட்டுக்கள் கட்டப்பட்டன. முதலாவது கட்டுமாணத்தில் உள்ள பலவீனம் காரணமாக அது இடையிலேயே நிறுத்தப்பட்டது. அடுத்ததும் கூம்பு வடிவத்தில் அமைப்பதற்குப் பதிலாக மிகவும் சரிவாக அமைந்து விட்டதனால்   இது ‘வளைந்த பிரமிட்’ என்ற பெயரைப் பெற்றது. மூன்றாவதாகக் கட்டப்பட்டது தான் சரியான பிரமிட்டின் வடிவத்தைப் பெற்றிருந்தது.இது வடக்குப் பகுதியில் அமைக்கப்பட்டதால் ‘செனவிருவின் வட பிரமிட்’ என்றழைக்கப்பட்டது. இது வளைந்த பிரமிட்டுக்கு அருகிலேயே கட்டப்பட்டிருக்கிறது.    

பிரமிட்டுக்களிலேயே மிகவும் பிரபலமானதும் அற்புதமானதும்  மர்மம் நிறைந்ததாகவும் கருதப்படுவது கிஷாவின் மேற்குப் பகுதியில் உள்ள கைரோவில் அமைந்துள்ள 'சியோப்ஸ்' எனப்படும் பிரமிட்டாகும். அதன் கட்டட வடிவமைப்பானது மிகவும் எளிமையானதாகவும் அதே சமயம் அபாரமானதாகவும் இருந்ததோடு மனித நாகரீகத்தின்  முக்கியம் வாய்ந்த இரகசியங்களையும் தன்னுள்ளே கொண்டிருக்கிறது என்று ஆராய்ச்சியாளர்கள் கருதினார்கள். இது பத்தாயிரத்துக்கும் அதிகமான தொழிலாளர்களைக் கொண்டு கிட்டத்தட்ட இரண்டரை மில்லியன் இராட்சதக் கற்களைக் கொண்டு கிட்டத்தட்ட 30 ஏக்கர் பரப்பளவில் 481 அடி உயரத்தில்  (அதாவது இவற்றின் மொத்த எடை 6 மில்லியன் ) முப்பது வருடத்திற்கும் அதிகமான காலப்பகுதியில் இந்தப் பிரமிட் கட்டப்பட்டிருக்கிறது என்று கட்டிட வல்லுனர்கள் மதிப்பிட்டிருக்கிறார்கள். இவ்வளவு மனித உழைப்பைச் செலவழித்து இதைக் கட்டி முடிக்க வேண்டிய தேவை தான் என்ன என்பற்கு இன்னும் விடை கிடைக்கவில்லை.

அத்துடன் இந்தக் கற்கள் எங்கிருந்து கொண்டு வரப்பட்டன என்பதும் மர்மமாகத்தான் இருக்கிறது .ஒரு பக்கம் பாலைவனமும் இன்னொரு பக்கம் கடலும் காணப்படுகிறதே தவிர அவ்வளவு இராட்சதப் பாறைகள் தோண்டி எடுக்கப்பட்டதற்கான அறிகுறிகள் பல நூற்றுக் கணக்கான மைல்களுக்கு இல்லவே இல்லை. சக்கரங்கள் கூடக் கண்டு பிடிக்கப்படாத அந்தக் காலத்தில் இந்தக் கற்களை எவ்வாறு கொண்டு வந்து சேர்த்திருப்பார்கள்  என்று நினைக்க நினைக்கப் பிரமிப்புத்தான்

.அத்துடன் ஏனைய பிரமிட்டுக்களைப் போல் இல்லாமல் , 345 அடி நீளமான நடைபாதையும் அதன் முடிவில் ஒரு பெரிய மண்டபமும் ஒரு பெரிய பொக்கிஷத்திற்கு இட்டுச் செல்வதாகத் தான் தோன்றும். ஆயினும் கி.பி 820 இல் கலிப் அப்துல்லா என்பவரால் இந்த பிரமிட் கண்டு பிடிக்கப்பட்ட போது மண்டபத்திற்கும் மன்னரின் உடல் வைக்கப்பட பேழைக்கும் இடையில் 3 இராட்சதக் கற்களால் அடைக்கப்பட்டு(இந்த இடத்தில் தான் பேழையைக் காவல் காத்து நின்ற காவலாளிகள் நின்றதாகக் கருதப்பட்டது.) ஒரு பெரிய எதிர்பார்ப்பைத் தந்த போதும் கூட அங்கு வெற்றுப் பேழை மட்டுமே கண்டு பிடிக்கப்பட்டது.

 

 

 

 

பிரமிட்டின் தோற்றம் பற்றி ஒவ்வொரு விதமாகக் கூறப்பட்டது.சிலர் கிறீஸ்தவர்களின் புனித நூலாகக் கருதப்படும் பைபிளின் கல் வடிவான பதிப்பே பிரமிட் என்றும் இதனைக் கட்டியது கடவுள் என்றும் இதில் இறந்த கால, நிகழ் கால, எதிர் கால சம்பவங்கள் பற்றிய பதிவுகள் உள்ளன என்றும் கருதுகின்றனர். பிரமிட்டின் உள்ளே செல்லும் பல்வேறு பாதைகளும் ஒவ்வொரு சரித்திர காலத்திற்கு இட்டுச் செல்பவை என்றும் அந்தப் பாதைகளின் குறுக்கே செல்லும் சந்திகள் ஒவ்வொரு முக்கிய சம்பவங்களையும் குறிக்கிறது  என்றும் உதாரணமாக கிறிஸ்துவின் பிறப்பு ,உலகமகா யுத்தங்கள் ஆகியவற்றைக் குறிக்கிறது என்றும் கருதினார்.

சிலர் பிரமிட்டீன் தோற்றமானது பை(22/7) என்பதான் சரியான பெறுமதியைக் குறிக்கிறது என்றும் இது வெளியுலகத்திலிருந்து வருகை தந்த வேற்றுக் கிரகவாசிகளால் தங்களது அடுத்த வருகையின் போது அடையாளமாக கொள்ளப்படுவதற்காகக் கட்டப்பட்டது என்றும் கருதினர். செவ்வாய்க் கிரகத்தின் சைடோனிக் என்று விஞ்ஞானிகளால் பெயரிடப்பட்ட ஒரு பகுதியில் காணப்படும் பிரமிட் போன்ற அமைப்புக்கும் எகிப்தில் காணப்படும் பிரமிட்டுக்களுக்கும் உருவ ஒற்றுமை காணப்படுகிறது என்று ரஷ்ய விஞ்ஞானிகள் தெரிவித்ததும் இதனை உறுதிப்படுத்துவதாக அமைந்தது.   

பிரமிட்டின் தோற்றம் பற்றி ‘ஓரியன் ’எனப்படும்  பிரபலமான தத்துவம் உண்டு. வான்வெளியிலுள்ள ‘ஓரியன் நெபுல்லா’ எனப்படும் நட்சத்திரக் கூட்டத்திலுள்ள  3 நட்சத்திரங்களின் அமைவிடத்தை ஒத்ததாகவே  எகிப்தின் கிஷாவிலுள்ள 3 பிரமிட்டுக்கள் காணப்படுகின்றன  என்றும் கருதியவர்கள் உண்டு. தங்கள் மன்னர்கள் நட்சத்திரங்களிலிருந்து வந்தவர்கள் என்று கருதியதால் இறந்த பின் அவர்களது ஆத்மாக்கள் அந்த நட்சத்திரங்களைச் சென்றடைவதற்காகவே அவற்றின் அமைவிடத்தை ஒத்ததாகக் கட்டினர் என்றும் ஒரு சாரார் கருதுகின்றனர்.

 

உலகிலுள்ள அனேகமான வெளிப்படுத்தப்படாத மர்மங்களுக்கும் அட்லாண்டிசுக்கும் முடிச்சுப் போடுவது வழக்கமாகியிருப்பது உங்களில் பெரும்பாலோனோருக்குத் தெரிந்திருக்கும். பறக்கும் தட்டு மர்மம், பெர்முடா முக்கோணப் பிரதேசம், நாஸ்கா வரை கோடுகள், ஈஸ்டர் தீவு இராட்சதச் சிலைகள் என்ற வரிசையில் பிரமிட்டுக்களும் சேர்க்கின்றன. கி.பி 10,000 இற்கு முன்னே வாழ்ந்த அட்லாண்டிஸ் தேசத்தவர்களே பிரமிட்டுக்களைக் கட்டினார்கள் என்று  தூங்கும் தீர்க்கதரிசியாகக் கருதப்பட்ட எட்கர் கேய்ஸீ என்றொரு எழுத்தாளர்  தெரிவித்தார். அவர் தன்னையே ஒரு அட்லாண்டிஸ் தேசத்தவன் என்றும், தான் தூங்கும் போது தன்னுடன் ஆவிகள் பேசுகின்றன என்றும் தன்னுடைய இந்த அளப்பரிய தீர்க்கதரிசனத்தின்  வெளிப்பாட்டுக்குக் காரணம் அட்லாண்டிஸ் தெய்வங்களும் ஆவிகளும் தான் என்றும் உறுதியாக நம்பினார்.

என்ன தான் மனிதன் அண்டவெளி, நிலவு, செவ்வாய் கிரகம் என்றெல்லாம் தனது தேடலை விரிவுபடுத்தியிருந்தாலும் பூமியிலேயே அவனால் கண்டுபிடிக்கப்படாத சில மர்மங்கள் தொடரத் தான் செய்கின்றன. அவற்றிலொன்று  பிரமிட் என்று கூறுவதில் மிகையில்லை. மனித குலம் வாழ்ந்து அழியும் வரையில் இந்த மர்மங்களின் முடிச்சு அவிழ்க்கப்படப் போவதில்லையா என்ற கேள்விக்குக் காலம் தான் பதில் சொல்ல வேண்டும்.

இந்தக் கட்டுரைக்குரிய தகவல்கள்  http://www.world-of-lucid-dreaming.com/unexplained-mysteries.html, http://communities.washingtontimes.com/,
neighborhood/egypt-pyramids-and-revolution/2011/sep/14/endless-mysteries-pyramids/, http://astromic.blogspot.com/2010/06/whats-mystery-about-pyramids-of-giza.html, http://www.atlanteanconspiracy.com/2008/06/greatpyramid-mystery.html
ஆகிய இணையத்தளங்களிலிருந்து எடுத்து மொழிபெயர்க்கப்பட்டு இடையிடையே சொந்தச் சரக்கும் சேர்த்துப் பரிமாறப்பட்டுள்ளது .